E diela nuk ka kaluar pa replika politike mbi çështjen e fortdebatuar të ligjit të importit të mbetjeve. Kryeministri Rama e ka patur me veten sot, qeverinë e tij, e cila, në një apologji të shkurtër të bërë nga ai vetë, nuk ka mundur dot ta sqarojë siç duhet opinionin. Por Rama ka shpallur një sfidë: atë të ballafaqimi me çdo ambientalist po të qe nevoja.
“Më duhet ta pranoj se nuk kemi bërë sa duhet dhe me kohë, për të informuar qytetarët mbi strategjinë e kësaj beteje të re dhe të madhe për ta bërë më të pastër Shqipërinë. E kam vënë re me keqardhje këto ditë se konkretisht ka një mungesë të madhe informacioni mbi dallimin thelbësor mes plehrave që nuk i duhen dreqit dhe që duhen asgjësuar dhe mbetjeve të riciklueshme që janë lënda e parë e ekonomisë së gjelbër dhe ndiej përgjegjësi për këtë. Ashtu si kundër dua të nënvizoj se jam dhe jemi të gatshëm të diskutojmë sy më sy për përmbajtjen e legjislacionit të ri me çdo ambientalist të keqkuptuar por të sinqertë në shqetësimin e vet. Por, njëkohësisht as nuk ka kthim mbrapa dhe as nuk ka hije dyshimi se legjislacioni i ri hap qartësisht, e zeza mbi të bardhë, një kapitull të ri për Shqipërinë e gjelbërt të gjeneratës tjetër”.
Por ka ka qenë i menjëhershëm reagimi i kryedemokratit Basha, që nuk ka hequr dorë prej “plehrave” si akuzë bazë politike, duke e plehërosur edhe kundërshtarin me akuza.
“#EdMashtrusi beri sot mashtrimin e rradhes. Ne monologun qe xhiron vete ju tha qytetareve se ligji i plehrave eshte i mire por ju jeni budallenj. 3 vjet me pare ju premtoi shqiptareve se kurre nuk do te lejonte mbetjet e huaja ne vend. Tani qe po i mbaron mandati, tinezisht, pa transparence kaloi ligjin qe i hap rruge Mafias te sjelle helmet e Europes ne Shqiperi. Ne keto 3 vite nuk prodhoi gje tjeter vec varferi, eksod, krim dhe droge. Tani do ta mbushe vendin me helmet dhe plehrat e botes. Shqiperia pa Edi Ramen eshte Shqiperia pa plehra. #Shqiperia me mire pa Edi Ramen”, ishte statusi i Bashës. /tesheshi.com/
