Kryeministri Edi Rama foli për herë të parë mbi precedentin e njoftimin nga Ministria e Jashtme shqiptare se ambasadorja Yuri Kim ishte në ikje nga detyra e saj në Tiranë.
Siç tha ai, procesi për zëvendësimin e saj nuk ka nisur nga qeveria shqiptare, por nga Departamenti amerikan i Shtetit.
“Nuk është thyer asnjë etikë e asnjë lloji dhe procesi për zëvendësimin e ambasadores ka nisur, siç është thënë nga Ministria e Jashtme. Natyrisht, nuk e kemi nisur ne procesin, e ka nisur Departamenti i Shtetit, si për të gjithë ambasadorët, kur bëhet fjalë për ambasadorët e SHBA-ve. Amerikën e kemi të veçantë, nuk komentojmë për të gjithë ambasadorët, sepse dhe sikur ta kometonim, askush nuk do ta kishte mendjen apo jo?”, ishte përgjigja e Ramës, jo dhe aq sqaruese.
Më tej, ai shuajti zërat për ftohje mes tij dhe ambasadores amerikane.
“Jo, ngjitja mes meje dhe ambasadores është më e fortë se kurrë, në mund ta përdorim metaforën me krisje dhe ngjitje. Nuk ka asnjë problem, ne kemi pasur dje një takim të gjatë, konstruktiv, miqësor, nuk ka asnjë problem. Domethënë, kush e shpreson krisjen, gabon”.
Por kujtojmë se Kim iu përgjigj diskutimit lidhur me mandatin e saj, duke theksuar se do të jetë “edhe ca më gjatë në Shqipëri”. /tesheshi.com/
