Pas një vizite të beftë në Hagë, ku u takua në kushte qelie me ish-presidentin Thaçi, kryeministri Edi Rama tha se ndihej besimplotë që ai do të arrijë të provojë pafajësinë përballë akuzave të ngritur nga prokurorët.
Rama tha pas takimit me Thaçin se lufta e UÇK-së nuk mund të futet në korniza të reja, pasi ajo tashmë është “është e futur në kornizën e artë të heroizmit, sakrificave, gjakut të dhënë”.
Presidentin Thaçi e gjeta në “top-formë” u shpreh Rama jashtë ambienteve të paraburgimit në Hagë.
“Ishte një çmallje e nevojshme.
Presidentin Thaçi e gjeta në top formë, i bindur mbase dhe më shumë nga sa e kam takuar para, që kjo ishte një rrugë e pashmangshme për të provuar katërcipërisht para drejtësisë pastërtinë e plotë të luftës çlirimtare, dhe pastërtimin e idealit të luftëtarëve të UÇK-së.
Nuk ka shumë për të thënë, natyrisht që të gjithë ne jemi të bindur se lufta çlirimtare e Kosovës nuk mund të rishkruhet, dhe nuk mund kurrësesi të futet në korniza të tjera, sepse ajo tanimë është e futur në kornizën e artë të heroizmit, sakrificave, gjakut të dhënë, dhe të gjitha përpjekjeve që kanë vijuar më tej për Kosovën demokratike dhe sovrane”, tha Rama.
Kujtojmë se shefi i qeverisë shqiptare ka shprehur gjithnjë kundërshti ndaj procesit në Hagë për ish-krerët e UÇK-së, madje dhe duke e ironizuar atë.
Ditë më parë madje, Rama iu shpreh se nëse Thaçi nuk do qe në Hagë, do e propozonte për president të Shqipërisë. /tesheshi.com/
