Kryeministri Rama tha se nisja e vaksinimit të të gjithë popullsisë po afronte për Shqipërinë.
“Shumë shpejt do të fillojmë vaksinimin masiv. Është çështje kohe shumë e shkurtër, jemi shumë afër dhe më vjen që nuk mund të them fjalën e fundit dhe mezi pres të them fjalën e fundit”, tha Rama në një konferencë për mediat.
“Jam i vetëdijshëm që ky është moment kyc në këtë luftë dhe lidhet me vaksinimin.
Duke parë ç’po ndodh në disa vende që për arsye të fuëisë së tyre, për arsye të pozicionit të favorshëm në raport më furnizimin e vaksinës, si Izraeli e Britania e Madhe që po e shohin me optimizëm fundin e tunelit, për shkak se janë vaksinuar më shumë se gjysma e popullsisë, është e qartë që vaksinimi është një armë shumë e fuqishme, për ta kthyer vendin në një vend pa COVID.
Është frymëzuese ajo që po ndodh në ato vende, ku Izraeli po shkon drejt hapjes konstante pasi e parapagoi trefish, vaksinën nga Pfizer dhe Moderna me procesin e shpikjes, pa pritur që të aprovohet dhe të bëhet funksionale. Izraeli bëri një bast shumë të madh, sot disponon gjithçka i duhet për të vaksinuar popullin e vet”, theksoi i pari i qeverisë.
Rama kërkoi që gjykimi ndaj qeverisjes së tij, sidomos në mandatin e dytë, të merrte në konsideratë se ç’të papriturash solli.
“Kush gjykon mandatin tonë të dytë dhe do të jap një mendim objektiv duhet të mos harrojnë që ka qenë mandati më i jashtëzakonshëm në histori, sepse gjysma e këtij mandati ka qenë në luftë me dy fatkeqësi të jashtëzakonshme dhe siç po dalim fitimitar nga lufta me tërmetin, duke i shëruar hap pas hapi plagët që hapi tërmeti, ashtu do të dalim edhe nga kjo luftë epidemike”, theksoi Rama. /tesheshi.com/
