Kryeministri Edi Rama ka befasuar me pohimin se “pa këtë parti (pra referuar PS-së në pushtet dhe atij vetë si kryeministër), nuk do kishte zyrtarizim të gjuhës shqipe në Maqedoni).
Deklarata e bërë në 26-vjetorin e themelimit të FRESH-it, Forumit Rinor Eurosocialist, vjen pak ditë pas miratimit në parlamentin maqedonas të ligjit që e bën shqipen gjuhë të dytë zyrtare. Rama tha se edhe për këtë arsye, duhet të ndihen krenarë ata që kanë votuar që PS të jetë në pushtet.
Nga ana tjetër, Rama tha se vetëm qeveria e tij po ka një vision për të regulluar raportet me Greqinë.
“Nga ana tjetër ju keni dëgjuar nga lloj-lloj kanakarësh të politikës së mbledhur tek ajo firma e çizmeve “ÇÇ” që ne qenkemi shkaktarë që u prishën marrëdhëniet me Greqinë. Jo! Ne jemi protagonistët e një politike të re që marrëdhëniet me Greqinë do t’i çojmë në një nivel të ri ku të dyja palët janë në tavolinë si fqinjë që respektojnë të drejtën për të qenë të barabartë. Ju siguroj që do t’i zgjidhim të gjitha problemet”, tha Rama.
Ndërsa protestën e paralajmëruar të opozitës më 27-janar, Rama e quajti si një tjetër përpjekje për të penguar reformën në drejtësi, e për më tepër sipas tij, për të penguar çeljen e negociatave. /tesheshi.com/
