Kryeministri Rama kërkoi mbështetjen e parlamentit për aksionin e qeverisë ndaj informalitetit, ndërsa në seancën plenare të së mërkurës ai dha edhe një përshkrim të gjerë të situatës ekonomike në vend. Sipas Ramës, akuzat e opozitës për vjedhje e korrupsion si shkaqe të rënies së të ardhurave në buxhet nuk qëndrojnë, pasi janë të tjera arsyet që kanë penalizuar qeverinë.
“Së bashku me ekspertët ndërkombëtarë që na asistojnë dhe FMN-në, kemi arritur në një konkluzion të qëndrueshëm dhe të përbashkët lidhur me pse-në e mospërputhjes mes planit dhe realizimit tone”, tha Rama.
Ai shpjegoi se rënia drastike e çmimit të naftës bruto, por edhe karburanteve të rafinuara në tregjet ndërkombëtare, ka pasur ndikim në rentën minerare, tatimin mbi vlerën e shtuar. Faktori tjetër ka të bëjë me reformën në sektorin e energjisë. Vitin e kaluar ra prodhimi vendas që u kompensua me rritjen e importit të energjisë. “TVSH e importit të energjisë ka ndikim të menjëhershëm dhe shumë të lartë në afatshkurtër, në krahasim me TVSH-në e mbledhur”, deklaroi kryeministri.
Së treti, ai renditi si factor rritjen e prodhimit vendas, që, sipas tij, ka sjellë rënie të të ardhurave nga doganat.
“Modeli ynë ekonomik synon devijimin e sipërmarrjeve të reja me kah prodhimin vendas, për të nxitur rritjen e prodhimit nëpërmjet një sërë masash lehtësuese. Ky fakt ka sjellë një rritje të qëndrueshme dhe të vazhdueshme të konstatuar që në 2014-n të importit të makinerive dhe pajisjeve të përjashtuara nga TVSH-ja. Ne kemi bindjen e konsoliduar së bashku me ekspertizën ndërkombëtare, se në një afat të mesëm kjo mangësi e sotme në të ardhurat do të riparohet”, tha Rama. /tesheshi.com/
