Kryeministri Edi Rama doli në New York mbi inisiativën e Shqipërisë për krijimin e një Aleance Humanitare me fokus global, duke thënë se një nismë e tillë propozohet për herë të parë në historinë e Këshillit të Sigurimit, e madje nga një vend anëtar i përkohshëm siç është Shqipëria.
Duke folur në takimin vjetor të “Iniciativës Globale Klinton”, Rama tregoi nxitjen bazë për këtë nismë: tërmetin e fundnëntorit 2019-të në Shqipëri
“Kur u goditëm nga tërmeti qemë të bekuar se patëm miq dhe nuk na lanë vetëm”, tha Rama, duke gjetur rastin për të potencuar Kosovën si një shtet i dytë shqiptar.
“Po kështu ishte e jashtëzakonshme të shihje vetë shqiptaret nga të gjitha vendet ku jetojmë, sepse ne jemi një rast mjaft i veçantë sepse jemi një komb i vogël, por me dy shtete, Shqipëria dhe Kosova dhe shqiptarët jetojnë kudo dhe ju e dini ndoshta më mirë se unë se nëqoftëse doni të hani mirë, shkoni në një restorant të mirë shqiptar në New York dhe gjithë ndihma prej tyre ishte e jashtëzakonshme”, tha Rama.
Kreu i qeverisë shqiptare tha se nevojat në nivel humanitar në të gjithë globin janë më shumë se 55 miliardë dollarë këtë vit dhe ajo çfarë është mbledhur është më pak se 11 miliardë dollarë.
“T’i japim jetë një platforme që çdokush në këtë botë donatorësh, kompanish e vullnetarësh mund të marrin informacion për nevojat, për kë po bën çfarë, për ku është e nevojshme ndihma dhe sigurisht, përmes kësaj platforme të mobilizohen më shumë financime”, theksoi ai.
Rama u shpreh se Shqipëria ka arritur të krijojë sinergjinë e duhur me organizatat e mëdha, ndonëse vendi i vogël, duke bërë me dije se iniciativës i është bashkuar edhe Google dhe Future.
“Dëgjoni: ne po bëjmë në mënyrë mjaft modeste pjesën tonë dhe po përfitojmë nga kjo mundësi për të shfrytëzuar maksimalisht të qenit anëtar të Këshillit të Sigurimit, por ne nuk jemi Shtetet e Bashkuara të Amerikës, jemi Shqipëria. Kështu që edhe pse jam shumë i gjatë, jemi shumë të vegjël për të imponuar ndonjë gjë apo për të udhëzuar botën drejt diçkaje. Ne thjeshtë besojmë që deri më tani ia kemi dalë të krijojmë sinergjinë e duhur me këto organizata shumë të mëdha, shumë më të mëdha se ne, që do të thoja është një start-up, është fillestare dhe me shprese dhe të tjerë do të bashkohen me ne”, tha Rama. /tesheshi.com/
