Kryeministri Rama iu kthye apeleve për situatën e rënduar COVID, nisur nga rritja galopante e infektimeve ditët e fundit, të cilat pos që kaluan shifrën 1 mijë, po njohin rritje të mëtejshme.
“Nuk jemi të shqetësuar sa i përket stabilitetit shëndetësor, por nëse nuk veprojmë tani atëherë situata rrezikon seriozisht të përkeqësohet, numri i infektimeve rrezikon të rritet dhe barra mbi shëndetësinë rrezikon të rritet.
Jemi besoj të gjithë të qartë që masat propozohen nga Komiteti Teknik i Ekspertëve, por nga ana tjetër ne që jemi këtu në radhë të parë në anën e qeverisë dhe ju të mediave kemi detyrimin që të bëjmë më shumë se të tjerët që zbatimi i masave të jetë korrekt”, tha Rama.
Sipas tij, pasojë e rritjes së infektimeve janë injorimi i masave.
“Që të funksionojnë siç duhet duhen zbatuar. Nga ana tjetër, qasja e autoriteteve të shëndetësisë dhe në tërësi të autoriteteve që janë përgjegjëse ka qenë një qasje më shumë sensibilizuese dhe mirëkuptuese se represive, mirëpo mesa duket nga çfarë konstatohet prej autoriteteve shëndetësore ka një rënie të angazhimit të qytetarëve duke filluar që nga vendosja e maskës kudo, jashtë shtëpisë, duke vazhduar me rregullat e vendosura për njësitë tregtare dhe me eksese të patolerueshme në lokale të caktuara, apo qoftë edhe nga politikanët.
Kjo është e papërgjegjshme dhe e pajustifikueshme sepse të gjitha bashkë bëjnë në tërësi atë që nuk duket sot si një front i bashkuar i përgjegjësisë qytetare në luftën kundër COVID”, theksoi i pari i qeverisë.
Rama paralajmëroi ashpërsim të masave në ditët në vijim, si dhe ndëshkim të ashpër për ata që nuk i zbatojnë.
“Nëse nga ana e tregtarëve nuk ka reagim të menjëhershëm patjetër që do ndodh, do jetë policia që do e imponojë me forcë zbatimin e masave. Natyrisht edhe me të gjitha gjobat përkatëse, të cilat do t’i rrisim së shpejti në ditët në vijim; do të rrisim gjobat për lokalet baret, dyqanet, restorantet e qendrat tregtare. Dhe do bëjmë shkallëzim sipas hapësirave dhe kushteve për abuzimin.
“Lokalet në Bllok apo në zona të caktuar, lokalet më të mira me më shumë fitime të bëhen vatra ku kërcen COVID-i me muzikë, është e patolerueshme”, theksoi kryeministri. /tesheshi.com/
