Kryeministri Edi Rama kërkon skanimin e burimeve njerëzore të administratës, qoftë në nivel qendror ashtu edhe lokal. Nga qyteti i Vlorës, ku nga e premtja është zhvendosur kabineti qeveritar, Rama kërkoi që çdo drejtori të hartojë një raport për t´ia dorëzuar çdo ministri dhe një kopje zyrës së zv/ kryeministres, e cila do të ndjekë proçesin.
“Dua të nënvizoj që ne jo vetëm kemi konstatuar, por ky është një mision i përbashkët i qytetarëve që në të gjitha ato shërbime që kanë të bëjnë drejtpërdrejtë me ta dhe posaçërisht në zyrat që u shërbejnë atyre, edhe në këtë qark, kemi probleme të mëdha për të zgjidhur.
Probleme të mëdha kemi në raport me efiçencën e shërbimeve, në raport me sjelljen, në raport me qytetarët. Po ashtu kemi probleme të mëdha në raport me betejën e nisur nga qeveria për të ulur barrën e burokracisë me qytetarët. Po e nis nga më e thjeshta, megjithëse ne kemi aprovuar që në mbledhjen e parë se nuk duhet tu kërkohen më çertifikata qytetarëve, vazhdon prodhimi i tyre. Ndonëse numri i tyre po shkon në rënie, sasia e çertifikatave dhe sasia e kohës që u merret njerëzve, volumi i radhëve që mbajnë, paratë, vazhdon të jetë në nivele të papranishëm. Për çfarë arsye u kërkohet certifikata? Kur them çertifikata, kërkohen edhe dokumente të tjera.
Po ashtu, tek Hipotekat në Vlorë njerëzit rrinë në radhë, dhe aty s’ka njeri. Me arsyetimin se ka defekte. Mirë njerëz që rrinë pa punë, por ka analfabet që merren në punë. Kemi komplet ca njerëz që nuk përputhin as trajnimin, e as eksperiencën. Të tilla raste ka pa fund. Justifikimet për ta, për punët e partisë, duhet të marrin fund. Skanim të gjithë administratës në qarkun Vlorë, dhe përputhshmëri midis vendit të punës, diplomës të çdo individi që mbulon një vend pune. Ky raport i duhet dorëzuar çdo ministri dhe një kopje zv/kryeministres. Ajo ndjek të gjithë procesin që po merremi.”, tha Rama. /tesheshi.com/
