Qeveria synon që të krijojë një shkollë profesionale në çdo bashki, pasi sipas kryeministrit Rama, shprehja e tij se mungojnë profesionistët mund të komentohet në një mijë mënyra, por është tërësisht e vërtetë. Në një takim për arsimin profesional, Rama shtoi se synimi është të ketë sa më shumë shkolla të binjakëzuara.
Duke folur në takimin “Arsimi profesional, garanci për punësim”, Rama vuri në dukje se ka qëllimin e padiskutueshëm që deri në fund të këtij 4 vjeçari të kemi një shkollë të arsimit profesional në çdo bashki të vendit. “Të paktën një. Dhe nga ana tjetër të kemi sa më shumë nga ato shkolla që të jenë të binjakëzuara”, tha Rama.
“E vërteta e shumë ndërmarrjeve sot është që kanë punë, po nuk arrijnë dot të gjejnë njerëzit e duhur për atë punë, që i kanë aftësitë ta bëjnë atë punë”, tha Rama, duke prekur edhe çështjen e shumëpërfolur të reformimit të skemës së ndihmës ekonomike.
“Përpjekja e madhe që po bëjmë për të çuar në punë ata që kanë dalë nga ndihma ekonomike është se nuk kanë shpesh herë asnjë aftësi. 25.300 studentë në arsimin profesional dhe janë afërsisht 20% e totalit, por janë ende pak në krahasim me çfarë duhet të jenë për t’iu përgjigjur tregut të punës”, vuri në dukje kryeministri. /tesheshi.com/
