Një paqe mes Izraelit dhe Palestinës, kryeministri Rama e sheh me interes strategjik për Shqipërinë, pa e shpjeguar se pse pikërisht për Shqipërinë, duke e cilësuar vendin që ai e udhëheq si “një vend paqësor dhe shumë-fetar me një rini të gjallë”.
Ky koment i tij vjen një ditë pas një konference paqeje në Paris, lidhur me atë çfarë po ndodh në Gaza, ku më shumë janë dhënë opinione se sa janë marrë vendime, ku Rama ka shfaqur zellin e tij tipik për të qenë dhe ai një aktor në skenën tragjike të Lindjes së Mesme.
Ai flet dhe për “agjentë kaosi” që duhet të mposhten, por pa u kuptuar se për kë e ka fjalën.
“Në Forumin e Paqes në Paris pata rastin të takoj liderë dhe zyrtarë të ndryshëm. Sa i përket Gazës, ne të gjithë biem dakord se konflikti dhe vuajtjet e tmerrshme që ai shkakton duhet të marrin fund.
Si një anëtar i përkushtuar i NATO-s, ne shohim një model shqetësues, një angazhim të keq për të shkaktuar konflikte dhe për të mbjellë kaos në hemisferën veriore, përfshirë Ballkanin Perëndimor. Këta agjentë të kaosit duhet të ndalen dhe të mposhten.
Fatkeqësisht, zgjatja e vuajtjeve të civilëve në Gaza vetëm ushqen ambiciet e Hamasit dhe agjentëve të tjerë të kaosit. Ndihem i inkurajuar nga përkushtimi i mikpritësit tonë këtu në Paris, Presidentit Macron të Francës, i cili, të shtunën, më 10 nëntor, bëri thirrje me forcë për një armëpushim të menjëhershëm. Jam dakord me vlerësimin e Presidentit Macron se nga armëpushimi do të përfitonte gjithashtu edhe Izraeli.
Si një vend paqësor dhe shumë-fetar me një rini të gjallë, një fund i menjëhershëm i vuajtjeve civile të popullit palestinez dhe izraelit dhe një paqe e qëndrueshme midis këtyre dy kombeve është me interes strategjik për Shqipërinë. Unë do të vazhdoj të punoj me udhëheqës të tjerë dhe zyrtarë të tjerë për këtë”, shkruan Rama në X. /tesheshi.com/
