Kryeministri Edi Rama ka shprehur sërisht gadishmërinë për të bashkëpunuar me opozitën dhe për të gjetur gjuhën e përbashkët. Në mbledhjen e parë të grupit parlamentar pas votëbesimit dhe betimit të qeverisë, Rama u shpreh se mazhoranca do të shkojë në sallën e Kuvendit për të debatuar me opozitën dhe për t´I kushtuar minutat njerëzve të thjeshtë.
“Qasja jonë nuk do të ndryshojë, pavarësisht reagimit të PD”, theksoi Rama.
Në vijim kreu socialist ka shprehur një falenderim për Gramoz Ruçin, për mënyrën sesi ka drejtuar 4 seancat e zhvilluara deri më tani në Kuvend.
“Një falenderim jo formal për të gjithë ju, dhe të për të gjithë deputetët, që për arsye objektive që nuk janë të pranishëm, lidhur me seancën për miratimin e qeverisë.
Në mënyrë të veçantë dua të falenderoj Gramozin, kryetarin e ri të Kuvendit, që realisht i ktheu dinjitet asaj salle, duke vendosur rregull. Po ashtu, dua të nënvizoj një detaj që është shumë i rëndësishëm, fillimi për herë të parë, i seancave në orën fiks të përcaktuar, është një normë që ne do ta respektojmë në katër vjet.
Nëse përqafuesit e popullit nuk janë në gjendje të respektojnë orarin e ditës më të rëndësishme të javës, që është Kuvendi i popullit, atëherë vajmedet për të tjerat”, tha Rama.
Ashtu sikunfdër kishte paralajmëruar, kreu socialist i tha deputetëve se do të nënshkruajnë në mbledhjen e ardhshme të grupit parlamentar një marrëveshje mirëkuptimi, e cila pikë së pari detyron qeverinë të mblidhet në çdo qark, për të zhvilluar takime me qytetarë dhe me përfaqësuesit vendorë.
“Në mbledhjen e ardhshme të grupit do të shkruajmë marrëveshjen e mirëkuptimit. Kjo marrëveshje do ti shpërndahet të gjithë deputetëve. Është një marrëveshje që sanksionon rregullat e bashkëpunim të qeverisë dhe grupit parlamentar, me PS-në. Është një dokument i gjatë.
Qeveria gjatë një viti politik, do të mblidhet në çdo qark, të paktën 1 herë, jo në mënyrë simbolike, po për të qëndruar dhe për të punuar bashkë me deputetët dhe për të thirrur në dëgjesa drejtuesit e institucioneve, për të dëgjuar njerëzit dhe për diskutuar me pushtetin vendor.
Çdo ministër gjatë një viti parlamentar, duhet të qëndrojë një herë në muaj në një qark. Thelbi i kësaj marrëveshje është që ne të zbatojmë kontratën e 25 qershorit”, u shpreh Rama. /tesheshi.com/
