Kryeministri Rama është rikthyer në Kavajë, aty ku arriti të triumfojë në zgjedhjet lokale të vitit 2011, duke ia kthyer votën majtas qytetin bastion të PD-së, e kjo me anë të Elvis Rroshit, një ish-demokrati që kandidoi për PS-në. Dhe, pasi e shndërroi në model reference për pushtetin lokal, e humbi në 2017-ën, me një kalim të dyshimtë sërish te PD-ja.
Dhe pikërisht, njeriun që e drejton Kavajën nën siglën e PD-së, Rama e akuzoi për paaftësi në mirëmbajtjen e konviktit të shkollës “Charles Telford Erikson” në Golem, një ndër shkollat më të vjetra të profilit bujqësor në vend, e cila u ndërtua krejtësisht e re përmes një investimi nga buxheti i shtetit me vlerë 250 milionë lekë.
“Të bëhet një projekt për konviktet dhe bëjmë konviktin si pjesë e shkollës dhe t’ia lëmë shkollës, ose të gjejmë një formë administrimi se bashkia këtu nuk ka ndërmend të bëjë as konvikte as shkolla. Bashkia këtu ndërton pallate në rërë, akoma sot e gjithë ditën dhe s’kanë faj përderisa sot akoma s’ka ardhur dora e prokurorisë. Ndërkohë bëni projektin ose në qoftë se e keni çuar në bashki ta merrni mbrapsht. Ta bashkojmë shkollën me konviktin dhe të gjithë këtë ta bëjmë si kampus për nxënësit dhe pastaj të shikojmë edhe projektin e shkollës 9-vjeçare Golem“, tha Rama.
Gjithashtu ai vizitoi një fabrikë të përpunimit të hudhrave, e cila ka përfituar 10 milion lekë nga fondi i programit për bujqësinë dhe zhvillimin. “Fakti që këta kanë çarë tregun holandez, që është me siklete të jashtëzakonshme nga pikëpamja e standardeve, është niveli më i lartë. Kjo është bujqësia që duam ne”, tha i pari i qeverisë. /tesheshi.com/
