Kryeministri Rama ndërsa mori fjalën në seancën e Kuvendit, që zhvillohet pa praninë e opozitës, duket se e ka adresuar gjithë rrjedhën e mendimeve të tij në përgjigje të akuzave që vijnë nga çadra në shesh. Ai listoi një sërë arritjesh, që sipas tij, janë bërë të mundura nga qeveria si aleate e njerëzve. “Çdo aleancë tjetër, tha ai, është kthim pas”.
Rama iu rikthye tezave që ka përdorur ditët e fundit gjatë takimeve në disa rrethe të vendit, duke theksuar se vetingu është proces kyç për zhvillimin ekonomik të vendit.
“Kush ka sot pakënaqësi apo edhe inat për situatën në të cilët ndodhet, të vetmin aleat që ka, ka këtë shumice qeverisëse, sepse pa asnjë diskutim edhe ne jemi të pakënaqur, edhe ne jemi të revoltuar në përpjekjen tonë për t’i hapur rrugë vetingut dhe për të bërë të mundur pastrimin e pallatit të drejtësisë dhe pastrimin e rrugës nga një pengesë e madhe që është një nga arsyet se Shqipëria nuk ka bërë dot aq sa është dashur të bëjë edhe pse Shqipëria mund të bëjë shumë më tepër me potencialet e veta”, tha Rama.
“Historia e Zharrzës tregoi edhe njëherë se njerëzit që kanë halle kanë vetëm një aleat dhe ky aleat është kjo shumicë. Sepse përtej retorikave për qëllime nga më të ndryshmet që janë qëllime të ulëta problemin e trajtoi dhe do vazhdojë ta trajtojë kjo qeveri”, tha Rama. /tesheshi.com/
