Nën titullin “Ta harrojnë se do të na ndalin”, kryeministri Rama ka reaguar sërish fort kundër akuzave dhe thirrjes së opozitës për dorëheqje. Me anë të një statusi në fb, jo aq të gjatë sa i djeshmi, Rama ka përshëndetur fillimisht aksionin e policisë në Babicë të Vlorës, shkarkimin e kokave të policisë së Elbasanit, e në fund është përbetuar për luftë të ashpër kundër krimit e korrupsionit bashkë me të, duke e mbyllur me fjalët “këtu jemi, do ta shohim”.
“E turpshme përpjekja e Frontit të Çorbës së Vjetër për të baltosur Policinë e Shtetit për operacionin e suksesshëm mbrëmë në Vlorë, si pjesë e luftës ndaj rrjetit kriminal të heronjve të kazanit politik e mediatik të 48 orëve të fundit.
Policia e Shtetit po bën të gjithë gjërat e duhura dhe çdo drejtues e punonjës policie, duhet të vazhdojë të bëjë përditë këtë që po bën qysh prej nisjes së kësaj faze të re të luftës me krimin, pas pastrimit të Shqipërisë nga kanabisi.
…
Ta harrojnë se do të na ndalin dot në këtë luftë, të gjithë ata që vazhdojnë t’i marrin shqiptrët për budallenj dhe që synojnë bllokimin e rrugës sonë për Shqipërinë që duam – me shtet, punë, mirëqenie. Me mandatin e 25 qershorit, ne do t’i bëjmë jo vetëm rrjeteve kriminale, po edhe korrupsionit në tërësi, atë që asnjë nga këta që hidhen sot përpjetë në kazanin e politikës e të medias, s’ka guxuar as ta mendojë, në çerekshekulli rrumpallë e bashkëjetesë harmonike të pushtetit me llumin, ku ky vend mbeti pa shtet, pa ligj, pa drejtësi.
Këtu jemi dhe do të shohim. Ditë për ditë.”, e mbyll mesazhin e tij shefi i qeverisë. /tesheshi.com/
