Rama mbylli një fjalim të gjatë në grupin parlamentar të PS-së duke shpallur se mandati i katërt duhet t’i kushtohet një drejtësie tjetër, më saktë një SPAK-u tjetër, atij që sipas tij vepron me standarte e jo si hetuesi komuniste.
Me shkak arrestimin e Erjon Veliajt, por dhe të shoqes me arrest shtëpie, Rama u tregua i ashpër ndaj manyrës së po vepron apo punon SPAK, duke shprehur alarmin për një “Republikë prokurorësh”, pra ku këta të fundit i japin vetes liri e pushtet për të bërë gjithçka dhe për të diktuar deri në politikën.
“Ne duam luftë kundër korrupsionit, pa kompromis. Por nuk pranojmë abuzimin me të vërtetën, me standardet, ndryshe kthehemi mbrapa. Këto janë shenja të qarta që duhen frenuar tani dhe me bashkëpunim konstruktiv”, tha ai.
Rama foli për një palë konstruktive mes politikës dhe SPAK-ut, pa e specifikuar atë, e cila siç la të kuptuar ai, do diktonte standarte në procese hetimi dhe verdikte gjyqësore.
“Sot në debatin publik ka vetëm dy pale: njëra që duartroket dhe brohoret sa herë që shfaqet gijotina sipas asaj pale të gjithë janë për burg, për litar, për t’u vrarë, dhe tjetra është pala që sulmon në mënyrë banditeske organet e reja të drejtësisë dhe që shënjestron me libër shtëpie prokurorët dhe gjykatësit që bëjnë punën e tyre duke nisur nga drejtuesi i SPAK që ka gjithë mbështetjen tonë sa i përket baltës që ka marrë dhe merr familjarisht, por mungon një pozicion konstruktiv, një palë konstruktive që duhet të jetë edhe garante e pavarësisë së Gjyqësorit, por duhet të jetë edhe garantë e lirive, të drejtave dhe standardeve demokratike. Siç thashë, përndryshe biem në kurthin e së kaluarës”, tha Rama. /tesheshi.com/
