Edi Rama nis mobilizimin e deputetëve për të votuar reformën në Drejtësi. Që prej ditës së djeshme ka nisur “apeli” për të gjetur një për një të gjitha votat që do të bëjnë të mundur kalimin e ndryshimeve kushtetuese më 7 korrik.
Burime brenda mazhorancës bëjnë të ditur se Edi Rama ka dërguar një qarkore te të gjithë deputetët socialistë, madje edhe Ben Blushit dhe Mimoza Hafizit që ende janë pjesë e grupit të Ps-së, që të mos largohen nga Tirana për të gjithë muajin qershor dhe në korrik.
Një e tillë mësohet se u ka shkuar edhe parlamentarëve të LSI-së që të jenë gati.
Sipas të gjitha gjasave, janë të siguruara 94 votat për ta mbyllur procesin, edhe nëse PD-ja nuk vjen në fund të votojë reformën.
Vetë deputeti i Partisë Demokratike, Oerd Bylykbashi, deklaroi dje se “mazhoranca ka blerë 94 votat për të miratuar reformën” ndaj kërcënoi se opozita do të “djegë mandatet e saj” dhe do të nisë një stinë protestash jashtë sistemit politik.
Në ditët në vazhdim pritet gjithsesi të vazhdojnë negociatat frenetike ndërmjet SHBA-së dhe kreut të Partisë Demokratike për të votuar reformën në Drejtësi.
Një burim diplomatik nuk përjashtoi mundësinë e bindjes së Partisë Demokratike në momentin e fundit. Dy ekspertë amerikanë po punojnë me juristët e selisë blu që të gjejnë një zgjidhje konsensusi për çështjen e vettingut, për të cilin PD kërkon që të ketë një përfaqësues të saj në komisionet e filtrimit të gjyqtarëve dhe prokurorëve.
Siç mësohet, zgjidhja mund të jetë brenda suazës që thotë Komisioni i Venecias; pra që opozita të ketë influencë në zgjedhjen e trupave kontrollues të gjyqësorit, por zgjedhja të bëhet në bazë të kritereve të përcaktuara në draftin e reformës.
Kjo parasheh që as mazhoranca të mos dalë nga “vija e kuqe”, por edhe PD-ja të jetë brenda suazës që mbron; pra që opozita të ketë influencën e vet në zgjedhjen e anëtarëve në Këshillin e Lartë të Gjyqësorit, Këshillin e Lartë të Prokurorisë, Komisionin e Vetingut të gjyqtarëve dhe Komisionin e Apelimit të Vettingut.
Ditën e sotme pritet një takim i radhës i ekspertëve të PD-së dhe të ambasadës amerikane. Deri në fund të procesit nuk do të ketë takim ambasadorësh por vetëm ekspertësh, të cilët më pas do hartojnë draftin që do të ratifikohet nga kryetari i PD-së dhe ambasadori amerikan në Tiranë, Donald Lu. /tesheshi.com/
