Kryeministri Rama pranoi korrupsionin nën qeverisjen e tij, një ndër njollat e Rilindjes, duke u mbrojtur me argumentin se PS-ja s’është as kishë e as xhami, apo se dhe ai s’është i dërguari i Zotit apo engjëll.
“Unë nuk jam i dërguari i Zotit, as engjëll nuk jam. Të jem i sinqertë: PS dhe unë nuk jemi pa të meta, kemi bërë gabime që i dimë dhe ka mundësi që nuk i dimë. Njerëzit e zakonshëm të këtij vendi nuk e kanë marrë të paktën një herë shërbimin që i takon.
Batakçinj e pisanjosë që e kanë njollosur në sytë tuaj emrin e kësaj partie duke futur duart në xhepin tuaj ka pasur dhe ka akoma, por PS nuk është as kishë dhe as xhami, është një vizion i njerëzishëm për Shqipërinë, është karakter i pakrahasueshëm me të tjerët dhe në kryebetejën që populli shqiptar meriton”, theksoi Rama.
Por sipas tij, gjërat kanë nisur të lëvizin në drejtimin që kërkohet.
Gjërat po lëvizin, SPAK-u është futur në veprim. Tipik rasti i gjykatëses që ishte shitur kokë e këmbë tek krimi, me një karshillëk përbuzës ndaj një populli të tërë dhe e rrethuar me një servis lugësh që hanin çorbën e pisët të një korrupsioni të pistë në shërbim të të dënuarve për krimet më të rënda.
Jam i bindur dhe jemi të bindur që është fillimi i kësaj rruge të re, por do ketë gjithnjë e më shumë përmasat e pritshmërisë tuaj dhe më pak trajtën e neveritshme të banalitetit që na e kanë plasur shpirtin 30 vjet. Na duhet një drejtësi e drejtë, e pavarur”, theksoi shefi i mazhorancës në një fjalëmbajtjeje të radhës paralektorale, në kërkim të mandatit të tretë. /tesheshi.com/
