Kryeministri Rama po shfrytëzon podcast-in e tij të fundjavës për betejën e tij me ikjet frenetike të shqiptarëve të tij nga Shqipëria, një lloj mallkimi për qeverisjen e tij, edhe pse fenomeni është dhe tejshqiptar. Shfaqur si prirje në 2016-ën, një vit pas Kosovës dhe Maqedonisë të ikjeve familjare me autobuzët plot, Shqipëria e Ramës po ka të lexueshme me sy të lirë e jo thjesht me statistika, boshatisjen e qyteteve të nivelit të dytë e tretë, pos fshatrave, ku vetëm qytetet e mëdha, përfshirë Tiranën, mbahen ende nga popullatat e mëdha.
Dhe Rama po kërkon ta luftojë këtë prirje më së shumti te pjesa propagandistike se sa te përmisimi i thelbit të qeverisjes së tij. Sepse bash kjo qeverisje, sado punë të mëdha të ketë bërë, nuk mundi kurrë të përcillte entuziazëm shoqëror, edhe pse udhëhiqet nga kredoja eufemike e rilindjes.
Ndaj, në podcast-et e tij, Rama po fton personazhe të ngrohtë me Shqipërinë, si për t’iu kundërvëne perceptimit se “këtë vend e ka marrë lumi” përfundimisht.
Kështu, i ftuar më i fundit i Ramës në podcast-in “Flasim” ishte shtetasi anglez Karl Roberts.
Me një karrierë 40-vjeçare në industrinë e naftës, Roberts erdhi fillimisht në vendin tonë si menaxher i projektit të madh Trans-Adriatik dhe në përfundim të projektit vendosi të qëndrojë në Shqipëri, ku ka blerë edhe një banesë dhe jeton këtu.
“Kam udhëtuar në botë dhe pëlqej vende si Shqipëria. Isha entuziast të vija këtu. Isha në Zvicër. Kur shkova të dielën pasdite çdo gjë ishte e mbyllur. Atje çdo gjë është e organizuar. Pëlqej vende si Shqipëria”, tha ai.
“Ndihem më i sigurtë në Tiranë, sesa do të ndihesha po të ecja në Londër e Manchester, sidomos mbrëmjeve”, shton ai.
Rama ndihej komod prej fjalëve të tij dhe i mbante iso. “Ke një telefon që shikon imazhet e bukura të Gjermanisë, Britanisë, aktorëve, makinave dhe thua po dua të iki. Por nuk është aq e lehtë sepse ka më shumë fotoshop sesa realiteti i një shqiptari që shkon atje. Por ajo që më bën përshtypje është se të gjithë të huajt janë të lumtur për sigurinë. Kur ua them njerëzve më thonë. Çfarë po thua siguri në Shqipëri e nuk ka në Londër, Berlin, Paris? Po!
Isha në Londër për t’u takuar me shqiptarët dhe historia e dëgjuar rëndom, shumë rëndom dhe po flas për njerëz që janë të stabilizuar, punojnë shumë, që nisi nga përpjekja për të bërë gjithçka dhe tashmë kanë familje, fëmijë. Ishte e njëjta gjë: Duhet të bësh dy punë, përndryshe nuk ia del dot. Sigurisht që në disa aspekte është mirë për fëmijët, por nuk është kaq e mirë edhe fëmijët. Koha e lirë për të shpenzuar me familjen është zero.
Kam pasur këtu njerëz që kanë ardhur nga emigracioni dhe thonë të njëjtën gjë. Kur njerëzit i shohin pagat nga këtu dhe bëjnë krahasimin, sigurisht që është dallim i madh. Por çfarë ka pas asaj page, kur vjen fjala për qiranë, taksat, fatura për të paguar, është e papërballueshme në Britani, apo kudo tjetër në Evropë. Pra duhet vendosur në peshore, por megjithatë unë i kuptoj njerëzit që duan të sfidojnë veten, duke u përpjekur aty ku mendojnë se mundësitë janë më të mëdha. Kjo është normale”, tha Rama.
“Shoh kaq shumë mundësi në Shqipëri, që patjetër duhen shfrytëzuar”, tha Roberts. /tesheshi.com/
