Një vendim i Këshillit të Ministrave që ka hyrë në fuqi pezullon të gjitha prokurimet publike për vitin 2017.
Çdo tender do të kalojë vetëm me miratimin e kryeministrit Edi Rama pas një kërkese të argumentuar nga titullari i institucionit përkatës.
Ky vendim vjen në një moment kur OSHEE po përgatitet të bëjë një tender të madh për blerjen e energjisë elektrike.
Në vendimin e botuar në fletoren zyrtare, që e publikoi oranews, thuhet se Këshilli i Ministrave ka vendosur pezullimin e përkohëshëm të fillimit dhe vijimit të procedurave të prokurimeve të fondeve në dispozicion të njësive të qeverisjes qendrore dhe të autoriteteve kontraktore në varësi të tyre, për vitin 2017.
Sipas vendimit, përjashtohen nga ky rregull kontratat e nënshkruara para hyrjes në fuqi të këtij vendimi dhe prokurimet për blerjet me vlerë të vogël.
“Lejimi i një procedure prokurimi mund të bëhet me kërkesë të argumentuar të titullarit të autoritetit kontraktor, për raste të veçanta dhe të nevojave urgjente, me miratimin e Kryeministrit”- thuhet në vendim. /tesheshi.com/
