Zëri Amerikës i është rikthyer goditjeve ndaj kryeministrit Rama, me një formë të paprecedent, nisur muaj më parë kur intervistonte disa figura, mes tyre dhe profesor universiteti, të cilët bëin thirrje për shkëputjen e shefit të qeverisë shqiptare nga aleanca me Erdogan.
Dhe, ditë pasi përcolli një shkrim me rastin e fallsifikimit të firmave nga një kompani që fitoi tenderin e Unazës së re, ku aludohej se ishte ndihmuar nga autoritete qeveritare, VOA ka publikuar këtë të hënë përgjime të ish-drejtorit të Burgjeve Arben Çuko, njëherësh ish-deputet socialist, ku aludohej gjithashtu se punësimet bëheshin me urdhër partie, duke u shpërfillur konkurset.
Rama nuk ka ngurruar të kthejë përgjigje, duke shkruar në rrjete:
“Erdhi dita që Zëri i Amerikes të flasë nga kazani i Tiranës, duke përgojuar dynjanë mbi bazë llogjesh telefonike. Për herë të parë në Albania organizohet konkurs publik për punësimet në burgje dhe kazani gjëmon deri në Amerikë e jehon në katundin tonë mediatik. Çfarë katandie“.
Ka reaguar dhe kreu demokrat Basha, duke thënë “Sulmi ndaj VOA është akt i turpshëm dhe i dëshpëruar i një të degraduari nga korrupsioni dhe lidhjet me krimin. Për të mbrojtur paratë dhe pushtetin ai është i gatshëm të sulmojë e denigrojë këdo. Fasada ra, tani është koha për ta shkulur atë dhe modelin e tij njëherë e mirë!”. /tesheshi.com/
