Kryeministri Edi Rama vlerësoi nënshkrimin e marrëveshjes për krijimin e shoqërive të reja të Ujësjellësave në bashkitë e disa qarqeve në vend, në kuadër të fazës së re të Reformës së Ujit.
Ai tha kjo do mbahet mend si një nga momentet më të rëndësishme të PS-së në qeverisjen e vendit, pasi e konsideroi ujin si naftën e shekullit të 21.
“Mbani mend sot çfarë po ju them: kjo që ne po bëjmë do të kujtohet si një nga momentet më të rëndësishme të Partisë Socialiste në qeverisjen e këtij vendi, në funksion të mbrojtjes së interesit kombëtar.
Sepse bëhet fjalë për një pasuri që ne e kemi bujarisht të dhënë nga Zoti, që është uji, dhe që çdo ditë, çdo muaj, çdo vit që kalon, kuptohet sa të drejtë kanë pasur ata që përpara sesa ne të përballeshim me këtë kohë të re ndryshimesh klimaterike, thoshin se uji do jetë nafta e shekullit 21″, u shpreh Rama.
Nga ana tjetër, kryeministri tha se Shqipëria nuk e ka siguruar dot energjinë e nevojshme për konsum në dimrin e pritshëm, duke paralajmëruar regjim kursimi.
“Ne kemi planin por është plan emergjence. Duhet të fillojnë të kursejnë. Pse duhet të jenë ndezur dritat tani? Se pronarit këtu nuk i ka ardhur fatura e merituar, se po t’i vinte dhe librat do i lexonte me neonin e rrugës. Kjo është gjëja që duhet të përfshihemi. Se kërkoni dopio ura… të kuptoni se nuk është momenti i duhur. Edhe njerëzit të kuptojnë dhe sensibilizohen”. /tesheshi.com/
