Kryeminstri Rama komentoi protestën e një grup gazetarësh dhe anëtarë të shoqërisë civile, të cilut u pozicionuan para parlamentit për të kundërshtuar ligjin “anti-shpifje” të qeverisë.
“Nëse ligji gjerman do të kishte subjekte ata që janë tek dera e parlamentit, ata sot do të ishin të gjithë me borxhe për të paguar pafundësinë e detyrimeve si rezultat i shkeljes së të drejtave të njeriut. Ata janë shkelës të drejtës së njeriut, që mos t’i cënohet në publik integriteti i tij, shkelës për të ndërtuar sipërmarrjen e tij të lirë, janë shkelës së të drejtës të shoqërisë për të qenë e mbrojtur nga pasojat e lajmeve të rreme apo shpifje”, tha Rama.
Sipas tij, shpifja ka dhe pasoja njerëzore.
“Më 26 nëntor ka vdekur një njeri i pafajshëm, ka humbur jetën një baba, dhe janë plagosur dhjetëra njerëz, sepse dikush nga ata atje ka nxjerrë lajmin se spitali i Durrësit po shembet. Po ata që janë atje kanë publikuar lajmin se qeveria fshinte 100 të vdekur në morgun e spitalit duke krijuar një situatë kaotike me familjarë që kishin humbur kontakt me anëtarët e familjes që ishin shëndoshë e mirë dhe u turrën tek morgu”, tha Rama gjatë një fjalimi në parlament, ku dhe mbrojti ligjin. /tesheshi.com/
