Kryeministri Rama mbrojti amnistinë fiskale, duke thënë se shumë “goditje nën brez” që i janë bërë kësaj nisme, disa herë edhe “me porosi”.
Sipas tij, kjo amnisti, vjen dhe në dritën e një krize prej lufte të cilën dhe Shqipëria duhet ta përballojë.
Në këtë drejtim, ai nuk kurseu kritikat dhe për ndërkombëtarët.
“Dua t’i kujtoj partnerëve tanë ndërkombëtarë që bota është në luftë, Shqipëria është pjesë e kësaj lufte, dhe ndryshe nga shumë vende të tjera, Shqipëria ka marrë një vendim me një kosto shumë të lartë, një kosto e cila, nëse lufta zgjat, mund të bëhet tërësisht e papërballueshme. Ky vendim është që fatura e energjisë, e cila në tregun kombëtar po i afrohet 500 eurove, nga 50-60 që ishte përpara, të mos reflektohet në faturën e energjisë së familjeve dhe biznesit të vogël. Nga dalin këto para, ndërkohë që ne jemi shumë të vetëdijshëm që paketa jonë e mbështetjes nuk ka zgjidhur të gjithë hallin”, tha Rama në një takim me biznesin.
“Dua t’ju kujtoj që ideja e amnistisë është një ide shumë e vjetër në Shqipëri, nuk është e re. Dhe asnjëherë nuk është materializuar si duhet nga një presion i brendshëm dhe i jashtëm, që besoj ka pasur arsye që sot nuk ekzistojnë më. Sot Shqipëria ka një sërë strukturash që mund të garantojnë me efikasitet, implementimin. Dhe ne nuk e kemi menduar sot, por që ditën e parë që kemi ardhur në qeveri, por nuk e kemi propozuar se kemi qenë të vetëdijshëm që ishte një ide të cilës nuk i kishte ardhur koha.
Propozimin e parë e kemi bërë pasi na ra një gjëmë e madhe në kokë siç ishte tërmeti. Qeveritë kur angazhohen në një amnisti, angazhohen në funksion të thithjes së parasë, dhe nxjerrjes nga e zeza në të bardhë. Dhe që t’i vish Shqipërisë dhe t’i thuash që amnistia është diçka e papranueshme, kjo është mungesë respekti. Respekti reciprok është A-ja e punës time në funksion të drejtimit të Republikës së Qeverisë së Shqipërisë. Por ta trajtosh Shqipërinë si vend me bisht, ndërkohë që amnistia bëhet në të gjitha vendet që ne na japin mësime, kjo nuk është asgjë e drejtë, asgjë e duhur”, arsyetoi Rama. /tesheshi.com/
