Me në krah Melonin, kryeministri Rama këmbënguli sërish në tezën e tij se media italiane po baltos Shqipërinë, siç thotë ai, me të pavërtetat e saj, referuar RAI 3.
“Trishtim për gjysmë të vërtetat që janë thënë në mediat italiane mbi Shqipërinë me qëllimin e qartë për të hedhur baltë mbi këtë vend për të sulmuar marrëveshjen mes dy qeverive në luftën kundër migracionit të paligjshëm.
Duhet të kenë turp të gjithë ata që të drejtën demokratike për ta kundërshtuar këtë marrëveshje, e kanë shndërruar në abuzim të pushtetit të katërt dhe kjo në kurriz të shqiptarëve e Shqipërisë dhe publikut italian.
Kam marrë mesazhe të shumta përballë lumit të baltës që shpërthyen ndaj Shqipërisë sonë”.
Rama mbrojti marrëvëshjen me Italinë për kampin e Gjadrit, gjithnjë me tezën e dy fqinjëve miq që duhet të jenë ndihmë për njëri-tjetrin.
Nga ana tjetër, ka kujtuar atë që po bën qeveria shqiptare më pritjen e afganëve, pasi asnjë vend perëndimor, sipas tij, nuk po i mirëpret.
“Qeveria jonë nuk ka njohur paqe në luftën ndaj krimit dhe nuk ka kthyer kurrë kurrizin ndaj Italisë dhe vendeve mike. Këtu pranë jeton një komunitet afgan, njerëz që janë larguar nga vdekja pas rënies së Kabulit, njerëz që nuk janë pranuar nga asnjë vend anëtar i NATO-s. Një pjesë e tyre shkuan në SHBA dhe Kanada. Të tjerë vijojnë të jetojnë këtu.
Disa gazetarë investigativë vijnë këtu dhe nuk shikojnë afganët, nuk shohin qindra emigrantë që kanë ikur nga vdekja, por shohin mafien që ekziston në mendjet e tyre kur paguajnë biletat për të ardhur në Shqipëri, për të informuar publikun me shkrime që janë parapërgatitur. Unë jam krenar për Shqipërinë që mund t’i shërbejë Italisë”. /tesheshi.com/
