Në një dalje për mediat, kryeministri Rama tha se rritja e infektimeve është brenda parashikimeve.
Nga ana tjetër, ai akuzoi opozitën se po përhap panik.
“Rritja e numrave ishte e parashikuar. Kemi një strategji që është e shkruar e zeza me të bardhë. Ne po bëjmë gjithçka dhe askush tjetër dhe askund s’po bën më shumë. Është fatkeqësi e madhe që një parti që pretendon se do bëhet shumicë, siç ka pretenduar prej vites, përsërit çdo ditë që spitalet janë në kolaps, se nuk po bëhen teste, që përsërit çdo ditë duhet bërë kjo apo ajo, a thua së është autorizuar me një mandat eksperti”, theksoi Rama.
“Unë thjesht bëja atë që sugjerojnë ekspertët dhe kam besim absolut te ata njerëz”, shtoi i pari i qeverisë.
Sa i përket Rindërtimit, Rama tha se procesi përballet me shumë të papritura, por që po ecet me maksimalen e shpejtësisë.
Sipas tij, po tentohet dhe standarti i atyre që ndërtohen.
“S’po bëjmë kafaz pëllumbash për të futur LSI, por lagje europiane, apartamente që do i marrin falas dhe që do e kenë vlerës si të ishin në një zonë në mes të Tiranës. S’do kenë dallime mes një apartamenti në Bllok dhe asaj në Spitallë, ‘5 maj'”, tha Rama.
Ai komentoi dhe refuzimin e Hollandës për hapjen e negociatave me Shqipërinë, duke ia lënë, si gjithëherë, arsyeve të brendshme.
“Holanda ka qenë gjithmonë skeptike. Ama merreni shtypin holandez, meqë jeni gazetar dhe të interesuar për Holandën, shikoni se si përdoren si gogol shqiptarët, që flitet për banda shqiptare të shpartalluara, pastaj kur shikon janë dy shqiptarë dhe të tjerët janë belgë, polakë…Është politike, elektorale, ka zgjedhje në mars sa për dijeni dhe bëni një studim tjetër, shikoni kalendarin e zgjedhjeve në BE, dhe qëndrimin e vendeve në raport me zgjerimin, nuk janë pa lidhje me njëri-tjetrin. Unë mendoj që duhet të presim deri në fund dhe nuk duhet të biem pre lajmeve të pjesshme dhe që janë të parakohshme për të nxjerrë konkluzione”, theksoi Rama. /tesheshi.com/
