Kryeministri Rama sqaroi në parlament se përse nuk pranon të ulet më naftëtarët e Ballshit pa e ndërprerë ata grevën e tyre të urisë.
Në një përgjigje ndaj deputetes Hajdari, e cila vizitoi gratë greviste, Rama tha se nuk mund të lejojë krijimin e një precedent që gërat zgjidhen me presion dhe ultimatume.
“Unë po ua përsëris çdo ditë që ato zonjat atje të ndalojnë grevën dhe unë menjëherë jam i gatshëm të shkoj atje dhe të qajmë hallet bashkërisht. Ata duhet ta mbyllin grevën, sepse kjo qeveri nuk bashkëbisedon nën presion.
Nuk mund t’i lejojmë vetes, me gjithë dhimbjes dhe respektin ndaj atyre grave, që këtu të krijohet precedenti që je i pakënaqur me sipërmarrësin aty ku punon, futesh në grevë dhe merr ato që kërkon pa pranuar as arsyen e tjetrit. Tjetri në këtë rast është qeveria, që administron kontributet e të gjithë shqiptarëve.
Kështu që përfitoj nga rasti t’iu ftoj dhe ju z.Hajdari që të bashkoheni me mua, në përpjekjen që gratë atje të mbyllin grevën, se në të kundërt nuk do të ketë zgjidhje, nuk do të ndodhë. Kanë provuar edhe të tjerë më parë që këtë qeveri ta trembin me presione, por s’ja kanë dalë. Për çfarë u fut Azem Hajdari në grevë urie? Për t’u dëgjuar, jo për të vdekur. Ne jemi gati të ulemi, por me arsye, jo me ultimatume, se nuk funksionon”, tha Rama.
Shefi i qeverisë përsëriti argumentin se nuk është qeveria e tij përgjegjëse për hallin e tyre.
“Punonjësit e një kompanie që falimenton trajtohen me asistencë sociale. Ky është detyrimi i shtetit. Ne jemi të dëgjueshëm ndaj hallit të tyre por nuk janë aty se duan asistencë sepse asistenca do sillte largimin e tyre nga aty. Pagat s’jua jep shteti”, tha Rama. /tesheshi.com/
