Kryeministri Edi Rama në një intervistë për austriaken “Der Standard” ka shprehur kritika në lidhje me Bashkimin Europian dhe politikën e saj të zgjerimit. Madje Rama shprehet se nuk është çudi që edhe vitin e ardhshëm. Shqipëria të mos marrë ftesë nga BE.
“Shqipëria i ka përmbushur detyrat, si ajo e reformës Kushtetuese, procesit të drejtë zgjedhor, por bisedimet nuk kanë nisur akoma. Nuk është çudi që edhe vitin e ardhshëm nuk do marrim ftesë nga BE. Dhe këtu nuk bëhet fjalë për Shqipërinë, por për vetë Europën që në mënyrë të padrejtë e ka ndalur proçesin e zgjerimit. Është absurde të thuhet se ju jeni vend kandidat, por ne nuk fillojmë me ju bisedimet. Kjo është sikur të thuhet: ne duam të martohemi, por ne nuk bisedojmë për datën e martesës”, thekson Rama.
Në vijim ai shton se gjithashtu nuk është e drejtë që Shqipëria është pas Malit të Zi dhe Serbisë, kur dihet se Mali i Zi është integruar shumë më vonë në NATO, është shumë pas ndryshimit të kapitullit të drejtësisë sëbashku me Serbinë.
“Ne i kemi kryer këto dhe është fantastike që ata bisedojnë, por është e padrejtë që me ne nuk kanë filluar bisedimet”, thekson Rama.
Në lidhje me reformën në drejtësi dhe vetingun, kreu i qeverisë thekson se shumë shpejt do të shihen rezultate konkrete.
“Ne tani kemi një godinë tjetër të drejtësisë dhe do bëjmë verifikime që punëtorët e kësaj godine të jenë njerëz të skanuar dhe jo secili mund të futet aty. Së shpejti do shihni rezultate konkrete”, tha ai.
Në pyetjen për “unionet e vogla” Edi Rama ka theksuar se kjo nuk është dëshira e tij, por bëhet fjalë për logjikë. “Banorët e Kosovës ishin nën një regjim brutal dhe ata dhe tani ata kanë shtetin e tyre, por përsëri nuk munden të udhëtojnë. Nuk ka vetëm lodhje të zgjerimit, por ka edhe lodhje të durimit. Kosova për liberalizimin e vizave ka kusht demarkacionin me Malin e Zi, ndërsa Serbia ka filluar bisedimet dhe jo që nuk ka nënshkruar demarkacionin me shtetet fqinje por as nuk njeh pavarësinë e Kosovës”, tha Rama.
Në lidhje me shqiptarët e Maqedonisë, Ramës iu drejtua një pyetje nëse është ai mbrojtësi i tyre, ndërsa kryeministri përgjigjet: “nuk besoj se do ishte skandal nëse qeveria austriake do merrej me austriakët jashtë kufijve të saj territorial. Aq më pak që shqiptarët në Maqedoni nuk janë minoritet, por një komb shtetformues. Nëse ndihmon shqiptarët atje, ndihmon Maqedoninë”.
Në lidhje me Gruevskin, Rama thotë se ata kanë qenë miq të mirë dhe Gruevski natyrisht e di se platforma nuk ishte sebep që ai nuk krijoi qeverinë. “Është në Kushtetutën e Shqipërisë që të mbrojë shqiptarët jashtë kufijve”, shton Rama
Në pyetjen për lehtësimin e kufirit mes dy shteteve shqiptare, Edi Rama është përgjigjur me pyetje se “a keni ju (austriakët) kufi me Gjermaninë?”. Kur gazetarja është përgjigjur se Austria dhe Gjermania janë pjesë e zonës Shengen, atëherë Edi Rama përsëri ka pyetur: “a keni kufi me Zvicrën?”. Gazetarja përgjigjet “po”.
“Pikërisht, këtë kontroll kufitar si Austria me Zvicrën do kemi edhe ne me Kosovën. Nuk do jetë pa kontrolle, por lehtësim për të dyja palët”, tha Rama.
