Krerët e politikës shqiptare u ulën përballë njëri-tjetrit në Presidencë, në prani dhe të ambasadores amerikane Yuri Kim. Ndodh kjo muaj pasi, për çështjen e tërmetit e më pas krizën e COVID-t, diskutuan “paqësisht” me njëri-tjetrin, një sjellje të cilën Rama e komentoi me nota positive.
Kësaj herë ka qenë në fakt një mbledhje e Këshillit të Sigurisë Kombëtare, me pjesëmarrjen dhe të tre ministrave, e gjitha në kuadër të një stërvitjeje të madhe të NATO-s në territorin shqiptar, të quajtur “Defender Europe 21”.
Për këtë stërvitje, në Shqipëri do zbarkojnë qindra trupa amerikane dhe nga vendet e tjera.
Në njoftimin zyrtar të Presidencës thuhet se “Stërvitja me trupa ‘Defender Europe 21’ drejtohet nga Komanda e Ushtrisë Amerikane në Evropë. Për nga numri i pjesëmarrjes së trupave ajo është stërvitja më e madhe në të cilën përfshihen edhe trupat e Forcave tona të Armatosura. Në këtë stërvitje do të marrin pjesë trupa nga 26 vende aleate.
‘Defender Europe 21’ do të shtrihet në disa vende të rajonit tonë. Qëllimi i këtij takimi, ishte koordinimi i masave paraprake, me objektivin e qartë, që faza përmbyllëse e kësaj stërvitje të madhe të realizohet me sukses të plotë”. /tesheshi.com/
