Kryeministri Edi Rama ka pranuar në sallën e Kuvendit, ku po paraqet programin e qeverisë së tij, defektet dhe gabimet në 4 vitet e shkuara. Rama shtoi se tashmë nuk ka kohë për të vazhduar në rrugën e vjetër, duke theksuar se axhendat partiake nuk do të mund të marrin më peng punimet e Parlamentit gjatë seancave plenare.
“Ne do të synojmë të jemi forca e shembullit dhe jo shembulli i forcës. Ne hyjmë më gjithë vullnetin e mirë për ta bërë Shqipërinë të ndryshojë duke nisur nga vetja ndryshimin e domosdoshëm. 25 qershorit provoni se nuk fiton kush i fryn më shumë zjarrtit, kush i qan më shumë hallet e miletit. Ju nuk jeni armiq as edhe kundërshtarë, por konkurentë”, tha Rama, duke iu drejtuar opozitës.
Në vijim ai ka premtuar që të rrisë çekun e bebeve, një iniciativë kjo e marrë që kur ishte kryetar bashkie, ku jepej e fëmijë të sapolindur një shumë e caktuar.
Duke kërkuar ndjesë për shumë bebe që nuk e kanë marrë ende këtë çek, Rama ka njoftuar se duke filluar nga viti tjetër do të ketë një fond më të shtuar lidhur me këtë iniciativë.
“Interesi i fëmijëve në qendër të politikbërjes, shpejtësi në reforma që bëjnë shtet në emër të fëmijëve. Nuk do ta harroj një stërgjyshe, që tha: çdo gjë për fëmijët e mi, është si të dyfishosh pensionin tim. Bonus mujor për familjet me shumë fëmijë për të nxitur rritjen ekomomike dhe demografinë. Kur isha në bashki krijova çekun e bebes, që u shtri në të gjithë Shqipërinë, u bë kopje politike qeveritare, por ka degraduar. Në 2015, 6 milionë ishte borxhi për moslëvrimin. Edhe gjatë mandatit të parë tonin nuk është përmbushur me korrektësi. i kërkoj ndjesë prindërve dhe fëmijëve, që nuk e kanë marrë në kohë apo se kanë marrë.
Do ta rrisim çdo vit, duke nisur nga viti i ardhshëm. Do të përqendrohemi edhe te shkollat dhe edukimi. U uroj mësuesve dhe nxënësve një vit sa më të mbarë sa më të suksesshëm dhe argëtues. Pagat e mësuesve janë rritur këtë vit ndjeshëm dhe do të rriten gjatë këtij mandati. Duhet të rritet mbështetja morale.
Thirrje kryetarëve të partive dhe deputetëve që të rritemi dhe të vetëndërgjegjësohemi për dëmin që u bëhet fëmijë si pasojë e mos respektit, ti mbrojmë me pasion pozicionet tona, por mos lejojmë që bashkëjetesa politike të prodhojë shembuj të këqij”, tha Rama.
Në fjalën e tij, kryeministri u ndal te emigrantët, kur tha se duhet të bëjmë realitet mundësinë që ata të votojnë.
“Ta bëjmë realitet votimin e emigrantëve në zgjedhje”, theksoi ai.
Rama premtoi një fuqizim të politikave të jashtme, sikundër uroi një bashkim doganor të shpejtë mes Shqipërisë dhe Kosovës.
“Miratimi nga ana jonë në nivel politik është gati, presim miratimin dhe nga Kosova. Ne do të shpresojmë zero probleme me fqinjët. Do të dakortësojmë problemet nëpërmjet dialogut. Me Greqinë ne duam miqësi reciproke”, tha ai.
Gjithashtu, Rama premtoi akordimin e një fondi solidariteti për viktimat e fatkeqësive natyrore në SHBA”, tha Rama./tesheshi.com/
