Kryeministri Rama u shfaq “i pangopur” pas një asambleje socialiste, teksa foli për ambicien e zgjedhjeve parlamentare të 2025-ës. “…Të marrim fitoren më shembullore të gjithë proceseve zgjedhore të realizuara deri më tani”, tha ai, duke kujtuar se një të tillë e arriti më pak se para një viti në Lokale, duke marrë pothuajse të gjitha bashkitë, me kurorën Shkodër, ama rihumbur Kavajën dhe padyshim, më e rënda, humbur Himarën.
Por interesante qe “moskokëçarja” e tij në lidhje me atë që mendon ppopulli në lidhje me qeverisjen, një zhgënjim i lexueshëm, por që sipas Ramës nuk është kështu.
“Për qytetarët mos u shqetësoni. Duhet të jemi shumë të sigurta dhe sigurt që leximin e opinionit të qytetarëve dhe ne dimë ta bëjmë më mirë se të tjerët. Prej vitesh e kemi lexuar opinionin e qytetarëve më mirë se të tjerët, madje kemi dhe instrumente shkencorë, anketime të rregullta për opinionin e publikut për çdo çështje. Kemi realizuar fokus grupe, për të kuptuar se çfarë presin për nga, çfarë kritikash kanë…etj. Për qytetarët mos u shqetësoni, pasi janë të qartë”, tha ai, duke vlerësuar dhe njëherë atë që e konsideron si “inteligjencë” e votuesit.
“Unë e kam thënë dhe e përsëris, qytetarët janë politikisht një bashkësi jashtëzakonisht e interesuar dhe jashtëzakonisht me nuhatje, dinë shumë mirë t’i ndajnë broçkullat nga thelbi”.
Gjithsesi, për të forca lëvizëse e tij mbetet “pakënaqësia”.
“Unë kam pakënaqësi për çdo gjë që bëj vetë, çdo gjë që bënë qeveria, pasi pakënaqësia na çon përpara, pa pakënaqësi do të thotë se s’kemi ç’ti japim më këtij vendi. Shyqyr që kemi pakënaqësi dhe që jetojmë me nevojën të jemi të tillë, që ta çojmë përpara këtë vend, ndryshe s’kemi më funksion”, thekson Rama. /tesheshi.com/
