Rama, pak filozofi te inceneratorët: Njerëzit s’janë engjëj!

Kryeministri Edi Rama u paraqit si dëshmitar në komisionin hetimor mbi inceneratorët, duke thënë, ndër shumë gjëra të tjera, se në jetën publike dhe qeverisje, hapësira nuk është e ëngjëjve, pasi ka dhe njerëz që mund të inkriminohen dhe korruptohen.

Duke folur konkretisht për ish-ministrin Koka, ndodhur pas hekurave, Rama e vlerësoi atë për kohën kur e pati vartës.

“Unë me ministrin e Mjedisit të kohës kam pasur një bashkëpunim shumë të mirë dhe për këtë punë kemi folur vijimësisht. Ka qenë super i angazhuar si ministër.

Për punë se cfarë ka bërë nëse e ka bërë pas shpinës së gjithë procesit qeverisës, se ky është një moment kur autoriteti shtetëror del nga procesi dhe bën një pit stop e bën marrëdhënie ilegale me një komponent, kjo nuk është cështje që ka të bëjë me procesin e që kryeministri mund ta marrë vesh duke folur përvecse në rastin kur kryeministri është vet pjesë, patjetër e merr vesh e thotë ‘po ti do shkosh ti marrësh e sa ti e sa unë’. Ky nuk është rasti me mua”, u arsyetua Rama.

“Qeveria, qeverisja, jeta insitucionale, jeta publike, nuk është hapësira e engjëjve por e njerëzve dhe, në këtë hapësirë ka njerëz që korruptohen apo që inkriminohen”, shtoi i pari i qeverisë.

Gjithsesi, ai nuk pranoi që inceneratorët të quhen aferë në komision, gjersa këtë e cakton verdikti gjyqësor.

“Doni të përqendroheni tek çështje, jo tek ‘afera’ që është çështje juaj? Mund ta përsëritni kudo përveçse përballë meje si dëshmitar. Afera është opinion”, tha Rama. /tesheshi.com/