Një ditë para takimit të planifikur me kreun e opozitës, Basha, kryeministri Rama e ka përcaktuar javën e pritshme si të së vërtetës. “Po ju them se java e ardhshme është java e të vërtetës. E gjithë shumica jonë, PS, LSI, PDIU, mbështet pa asnjë ngurim draftin e dakordësuar me Shtetet e Bashkuara të Amerikës dhe me Bashkimin Europian”, tha Rama, pasi shpjegoi disa detaje të atij që do jetë kompromisi i ofruar për opozitën.
“Duan 2 të tretat e vendimmarrjes. Duan të jenë edhe ata pjesë sepse kanë bërë një kusht, duhet votuar nga parlamenti për kandidaturat me 2 të tretat sa të jetë gjallë Edi Rama. S’ka problem nuk mund t’i premtoj se do të vdesë kur të duan ata, por mund t’i premtoj se deri sa të jem gjallë me 2 të tretat”, tha kreu i qeverisë.
Por ndërkohë, nga selia blu, Rama është portetizuar me një gjuhë të ashpër. “Për Edi Ramën, tipat si: tutorë, përdhunues, trafikantë droge, rrëmbyes personash, vrasës, nuk janë kriminelë. E thotë ditën kur çdo shqiptar, dhe veçanërisht çdo grua, vajzë, nënë, pret nga Edi Rama një ndjesë, një falje, pse ai mban në pushtet, vazhdon ta ushtrojë pushtetin me përdhunues e tutorë. Nuk kërkon ndjesë, nuk u zë as emrin në gojë. Ndërkohë që rroshi e bushi, prenga e ndoka, e dhjetra e qindra si këta që gjenden në krah të Edi Ramës, janë plagët e realitetit sot”, thuhet në një deklaratë për shtyp të PD-së. /tesheshi.com/
