Maturantë të shumtë kanë vijuar në ditën e dytë të protestës së tyre, sot edhe para selisë sqë Kuvendit. Ata kërkojnë rikthimin e sistemit meritë-preferencë, duke mos pranuar asesi këtë metodë të reformës së re që i ka lënë jashtë për momentin, edhe pse kanë mesatare mbi 9-të.
Por qeveria u kë bërë thirrje për durim, derisa të përfundojë faza e parë, ku fituesit janë të detyruar të zgjedhin vetëm një degë nga disa, e kështu që kuotat e liruara shkojnë për ata me rezultate më të ulëta sipas përllogaritjeve, edhe pse pra janë me mesatare mbi 9-të.
Raundi i dytë nis në 22 Shtator dhe aplikimi është i njëjtë. Në përfundim do të ketë edhe një raund të tretë, i cili, sipas Ministres së Arsimit, do t’i japë zgjidhje përfundimtare regjistrimit.
Ndërkohë, edhe kryeministri Rama është përpjekur ta sqarojë këtë skemë duke kërkuar moralisht që të kihet durim nga ana e maturantëve.
Në facebook, ai ka shkruar:
Një nga risitë e Reformës në Arsim është më të mirët zgjedhin të parët!
Po sigurisht, një maturant i shkëlqyer nuk mund të shkojë në tetë, nëntë apo dhjetë degë, ku shpreh fillimisht preferencën dhe del fitues! Deri në 20 shtator, çdo fitues në më shumë se një degë, do të regjistrohet në degën e vetme që do ndjekë dhe, automatikisht, të gjitha vendet e tjera që ka zënë përkohësisht në listën fituese, do të lirohen për shpalljen e fituesve të tjerë.
Pra, e drejta për të zgjedhur përcaktohet sipas meritës, me procedura transparente, jo më në errësirë sipas tarafit apo parasë… Rregullat janë të qarta dhe kush ndjek si duhet procedurat, padiskutim do të ushtrojë të drejtën e vet për shkollim të lartë, sipas meritës.
Suksese dhe mos harroni: Janë 25 mijë kuota për 27 mijë e 600 aplikues, kështu që ata që do mbeten jashtë në fund të procesit, do të jenë një numër i kufizuar e me rezultatet më të dobëta ndër gjithë të tjerët. Prandaj respekt për meritën e secilit dhe durim deri në përfundimin e procesit!
Ndërsa nga ana tjetër, kreu i opozitës Basha i ka quajtur lotët e maturantëve të mbetur pa degë si treguesin më të mirë të një reforme të rënë sipas tij që në fillim të aplikimit të saj. /tesheshi.com/
