Kryeministri Rama njoftoi për porcionin nr.2 të lirisë për bizneset, e cila starton të hënën e ardhshme.
“Lista me bllokun e dytë të bizneseve që rinisin punën do të publikohet sot në e-Albana. Me këtë listë rikthehen në punë mbi 27 mijë punonjës. Hyjnë shitje me pakicë e veshjeve, tregti me pakicë e veshjeve, tregtia me pakicë e tekstileve, e këpucëve, e mobilieve, artikujve shtëpiakë, tregtia me pakisë e luleve, bimëve, kafshëve të shtëpisë, e pajisjeve audio të regjistruara, e qylymave, dyshemeve, lojërave dhe lodrave”, tha shefi i qeverisë.
Gjithashtu, ai njoftoi dhe për bizneset e fundit që do hapen nëse vijon ky trend i një lirie hap pas hapi.
“Qendrat tregtare do të hapen të fundit….Kafenetë do të jenë të fundit që do të hapen”, tha Rama.
Ndër të tjera, ai njoftoi dhe për faljen e detyrimeve fiskale për biznesin e vogël.
“Të gjitha bizneset e vogla nuk do të paguajnë taksa deri në fund të këtij viti. E kemi thënë. Për bizneset e mëdha, një pjese do t’i shtyhen…Bizneset e vogla do të falen të gjitha taksat për këtë vit edhe nuk kanë punë fare as do u kërkojë asgjë vitin tjetër. Çfarë iku, iku që të marrin veten plotësisht. Me këtë mbështetje, me hapjen dhe taksat që po falim nuk do të dalin keq, mbase do të dalin më mirë se të tjerët dhe e meritojnë se janë më të vegjël dhe më të dobët”, theksoi i pari qeverisë. /tesheshi.com/
