Kryeministri Rama kumtoi fundin e “vuajtjes biblike” të qindra qytetarëve që prisnin të kalonin në Greqi, të cilët ndenjën për gati 5 ditë në radhë në doganat e Kakavijës dhe Kapshticës, sidomos në të parën, duke sjellë një dramë humanitare.
“FALEMINDERIT të gjithë atyre që kontribuan për zgjidhjen e ngërçit të rëndë në pikën kufitare të Kakavisë; qytetarëve në radhë të parë, që në shumicën dërrmuese patën mirëkuptim e durim megjithë hallin e madh; Emergjencave Civile, forcave të ushtrisë e të policisë, trupës së Urgjencës Shëndetësore dhe strukturave vendore, që u gjendën pranë njerëzve me përkushtim e pa orar; të gjithë atyre në vendin fqinj që u përfshinë pa rezervë në përpjekjen për ta lehtësuar situatën, në kushtet kur regjimi i ri kufitar e bënte punën për zgjidhjen e saj tejet të vështirë.
U uroj nga zemra një qetësim sa më të shpejtë dhe rifillim normal të jetës së përditshme, të gjithë bashkëqytetarëve që e hoqën atë siklet të madh dhe u lutem të tjerëve në vijim, të ndjekin me vëmendje kriteret e përcaktuara në shtetin fqinj për kalimin e kufirit, e të mos nisen pa u siguruar se mund ta kalojnë kufirin pa siklete të ngjashme.
Rrugë të mbarë udhëtarëve të fundit dhe ruani veten e të tjerët nga virusi i rrezikshëm Covid19”, shkroi shefi i qeverisë.
Kujtojmë se situata e rëndë u krijua pas autoritetet greke lajmëruan se pas datës 16 gusht, çdo shtetas që hynte në Greqi duhej t’i nënshtrohej një karantine 7-ditore.
Kjo bëri që shumë shqiptarë rezidentë në Greqi e të ndodhur në Shqipëri me pushime, të dyndeshin drejt fqinjit për t’i shpëtuar karantinës.
Por procesi i tamponit në doganë bëri që ritmi i procedurave të kalimit në doganë të ishte jo më ritmin që duhej, gjë që solli radhë kilometrike. /tesheshi.com/
