Kryeministri Edi Rama i tha medias në një konferencë të posaçme për shtyp se ka hartuar një draft në lidhje me krijimin e Asocacionit të Komunave me shumicë serbe në Veri të Kosovë.
Ky plan, siç tha ai, iu është dorëzuar partnerëve ndërkombëtare dhe pret që të pranohet nga Prishtina dhe Beogradi.
Sipas Ramës, ky plan do të sjellë ç’tensionimin e situatës dhe normalizimin e marrëdhnies së Kosovës me ndërkombëtarët.
“I kam përcjellë Macron-it dhe Scholz-it një draft për Asociacionin, ku ia kam vënë në dijeni edhe Charles Michel”, pohoi Rama, duke shtuar se çelësi i zgjidhjes së krizës gjendet pikërisht aty.
“Unë jam këtu të ndaj me ju një fakt të panjohur deri më sot. E kam ditur me kohë që nyja gordiane do të ishte deri në fund Asocacioni i Komunave me shumicë serbe dhe jam i bindur se asnjëra nga palët nuk e do dhe do të bëjë çmos ta shtyjë në pafundësi duke mbajtur krizën me çdo lloj artifice. Besoj se krijimi i Asocacionit është çelësi për të hapur derën e afirmimit ndërkombëtar të Kosovës e uljes së saj në Kombet e Bashkuara”, arsyetoi kreu i qeverisë shqiptare.
Rama tha se plani nuk do të bëhet publik dhe se nuk është konsultuar me Kurtin.
“Ky është dokument konfidencial i cili nuk pretendon të jetë zgjidhja ideale, por është një dokument i nivelit më të lartë ndërkombëtar që merr në konsideratë arsyet për krijimin e Asociacionit dhe se ai është pjesë e organizimit të jetës në republikën e Kosovës. Adreson të gjithë rekomandimet e Gjykatës Kushtetuese të saj. Shpresoj që ky material ta çojë dialogun në një nivel tjetër e jo të flasin me vete e për vete.
Situata po bëhet alarmante dhe unë nuk mund të qëndroj spektator duke parë si Kosova tkurret në sytë e atyre e aleatëve të saj. Jam i shqetësuar për tonet ultimative të aleatëve që mund të sjellin pasoja të mëdha”, tha Rama.
Po kush e ka përpunuar planin? Përgjigja e Ramës ishte kjo:
“Është një draft i punuar nga ekspertë të nivelit më të lartë amerikanë dhe europianë prej kohësh gjë që është bërë pikërisht në rast se do të vinte kjo ditë”. /tesheshi.com/
