Edi Rama ka nisur “çmontimin e tepsisë” së vjetër të pushtetit.
Pas mbledhjes së djeshme të qeverisë, sot mësohet se është larguar një nga drejtorët më të rëndësishëm që ishte emëruar nga LSI-ja.
Bëhet fjalë për Drejtorin e Operatorit të Transmetimit të Energjisë, Engjell Zeqo.
OST është një kompani publike që vendimin formalisht e merr nga Këshilli Mbikqyrës dhe jo nga qeveria apo ndonjë strukturë vertikale.
Burime pranë kompanisë bënë të ditur se ndryshimi është bërë sot në mëngjes, ndërkohë që ende nuk është publikuar emri i drejtorit të ri.
Ministria e Energjetikës, gjatë qeverisjes PS-LSI nuk ka qenë domen i partisë së Metës, pasi drejtohej nga Damian Gjiknuri, por ajo u nda në përqindje ku OST-ja dhe KESH, përgjthësisht janë kontrolluar nga njerëz të LSI-së, kurse OSSH ishte e gjitha e PS-së.
Siç mësohet lëvizja e madhe pritet të bëhet pas miratimit të strukturës së re të ministrive, por edhe drejtorive, skema e të cilave u miratua në Asamblenë e Përgjithshme të PS-së.
Sipas strukturës së re, do të zvogëlohet numri i drejtorëve të përgjithshëm, ndërkohë që disa drejtori do të shkrihen edhe bashkohen me të tjerë.
Kështu për shembull në ministrinë e Arsimit, do të shkrihen drejtoritë rajonale që janë në çdo qark, ndërkohë që Tirana ka dy të tilla dhe do të ngrihen vetëm katër drejtori në të gjithë vendin.
Po ashtu disa institute që drejtoheshin nga njerëz të LSI-së do të bashkohen me organe të tjera, duke bërë të mundur që ndryshimet të mos prekin statusin e nëpunësit civil që kanë përfituar një numër i madh zyrtarësh. /tesheshi.com/
