Edi Rama ka deklaruar sot se reforma në drejtësi duhet të shkaktojë një tërmet në drejtësinë shqiptare, ndërkohë që në shtator nuk e përdori fare frazën “mund”.
Kryeministri mbajti sot një konferencë maratonë për shtyp ku si kryefjalë kishte synimet për vitin 2016. Rama tha se vendi do të përfitojë nga reformat e ashpra të ndërmarra këto dy vjet, ndërsa reforma në drejtësi do të jetë më thelbësorja.
Kreu i qeverisë shqiptare, deklaroi më tej se do të ketë konsensus me PD-në pasi janë marrë rekomandimet e Komisionit të Venecias si nga mazhoranca ashtu edhe nga opozita, për draftin e përbashkët që do të plotësohet më tej mbi themelet e këtyre propozimeve.
Kryeministri tha se nuk e ka lexuar draftin e reformës në drejtësi. Këtë, shefi i qeverisë së Tiranës e argumentoi me faktin që politika nuk duhet të përfshihet në këtë proces.
Ndërkaq, Rama ka replikuar në distancë me Kryeprokurorin Adriatik Lalla, i cili ka deklaruar se nuk është pyetur për draftin.
Kryeministri foli për një ndryshim rrënjësor në sistemin e drejtësisë, një reformë që sipas tij nuk mund të quhet e tillë nëse nuk prodhon tërmet, tronditje për të sjellë modernizim.
“Reforma në drejtësi është kryefjalë e mandatit tonë dhe si kryefjalë është me një peshë shumë të madhe që prek shumë interesa dhe që nga ana tjetër domosdoshmërish duhet të prodhojë tërmet, një tërmet në të gjithë themelet e sistemit aktual të drejtësisë. Nëse nuk e prodhon këtë tërmet, nuk është kryefjala e duhur. Kemi qenë të vetëdijshëm për vështirësinë e saj dhe për faktin që nuk ka pasur asnjëherë reformë. Kjo ka ardhur si rezultat i pengesës që ka krijuar politika, mungesë vullneti, eksperience, dije, dhe që besoj pas 25 vjetësh është një pengesë e kapërcyeshme me vullnet dhe me dijet e plota në këtë proces”, tha Rama.
Ndërkaq, kryeministri nuk ka komentuar zërat për një përplasje me Metën, por ka thënë sërish që gjërat “janë grurë” duke sjellë mundësinë imperative të aludimit për të kundërtën.
“Unë besoj shumë që ne do t’ia dalim dhe asnjë përpjekje e çfarëdolloj për të çarë shumicën në këtë proces nuk do të ketë sukses. E them sepse ka shumë përpjekje në këtë drejtim, nuk do të kenë sukses, reformën në drejtësi do ta bëjmë së bashku, por ne si shumicë nuk do të shkelim asnjë parimësi dhe nuk do të bëjmë asnjë kompromis për të reduktuar pushtetin e drejtësisë dhe efektin tronditës që kjo reformë do të ketë. Pa një tronditje nuk ka modernizim. Ky është një pushtet i korruptuar dhe kriminal në kuptimin e plotë të fjalës. Reforma shikohet si një formë tronditëse që do të sjellë burgosjen dhe pak kush e shikon si bazën mbi të cilën do të ngrihet një sistem modern dhe i pavarur që do t’u shërbejë atyre që nuk gjejnë drejtësi për pronën e tyre”, u shpreh Rama. /tesheshi.com/
