Nga Vlora, kryeministri Rama denoncoi sërish llojin e fushatës së opozitës me tubime masive me risk COVID. Ai i quajti ato si “dasma”.
“Për fat të keq kemi një energji infektuese që prodhohet çdo ditë me dasmat e rrugëve të atyre që e kanë vënë interesin e partisë dhe interesin e pushtetit, e planit për pushtetin mbi interesin e shëndetit të njerëzve.
Edhe kjo do të mbarojë shpejt, lutemi që kostoja të mos jetë e përballueshme.
Kjo që po ndodh çdo ditë me tufat e shekullit të kaluar, që mblidhen me bori, e dy gishta do të sjellë rritjen e numrit të infektimeve dhe kjo është e pashmangshme”, tha Rama.
Duke inspektuar vaksinimin në Vlorë, Rama denoncoi dhe njëherë atë që ndodhi me rebelimin në Albcontroll, që sipas tij ishte një skenë e pastër politike.
“Duhet ta rikujtoj që patëm një frenim të vogël në ekzekutimin e planit tonë të ritmit për këto dy ditë, si rezultat i bllokimit absurd, i goditjes së çmendur që ju dha aeroportit të Rinasit, me idenë diabolike të bllokimit të vaksinimit për javë dhe njëkohësisht të nxitjes të dëshpërimit dhe rrëmujave siç është në natyrën dhe çështjen të organizatorëve dhe nxitësve të asaj goditjeje.
Ishin llogari të bëra dhe ne ishim të përgatitur për të vënë një plan rezervë.
Arritëm të sjellim vaksinat në një kohë rekord, edhe pse na u krijua një ngërç me kompaninë që donte t’i çonte në një shtet tjetër.
Ne vazhdojmë dhe plani për gjysmë milionë vaksinime brenda majit vazhdon. Me këtë program ne po godasim hallkat e zinxhirit të infektimit dhe po sigurojmë që sezoni turistik të jetë shumë më i lehtësuar.
Do fillojmë me vaksinimin e gjithë stafeve të industrisë hoteliere. Lajmi i mirë është që fasha ulet në +60 në pak ditë, ditën e hënë”, tha Rama. /tesheshi.com/
