Gjatë një takimi të zhvilluar sot me 20 eksportuesit më të mëdhenj në vend, Kryeministri Edi Rama tha se është themelore të shfrytëzohet çdo mundësi dhe të identifikohet çdo rrugë për të mbështetur prodhimin industrial për eksport. Rama shprehu bindjen se kjo është një kolonë shumë e rëndësishme për të ndërtuar Shqipërinë që dëshirohet.
“Jemi të inkurajuar nga shifrat që tregojnë se nëse do të zbresim efektin e çmimit të mineraleve dhe lëndëve djegëse, eksportet janë rritur me 5.2% krahasuar me një vit më parë. Jemi të vetëdijshëm se ka shumë mundësi ende për produktet ushqimore, mjafton t’iu them disa shifra shumë domethënëse, ku produktet e bulmetit janë rritur me 582% bashkë me mjaltin natyral, ndërsa frutat dhe perime janë rritur me 133% në raport me një vit më parë”, u shpreh Rama.
Sipas kreut të Qeverisë, ajo që duhet shënuar është se Shqipëria hyn ndër vendet me eksporte të rritura dhe ka eksportet më të larta në rajon. Në këtë linjë tha eksportet me Kosovën kanë shënuar rritje më shumë se asnjëherë, ndërsa nënvizoi se deri në vitin 2014 eksport- importi nuk shënoi ndonjë rritje, ndërsa në 2015, u vunë re efekte të ndjeshme rritje. Rama tha se eksportet e Shqipërisë drejt Bashkimit Europian, mbeten 40% nën potencialin që vendi ka mundësi të shfrytëzojë, ndaj siç tha ai, gjithë këta tregues rritje shihen si shenja inkurajuese. /tesheshi.com/
