Kryeministri Rama nisi një vizitë në Shkodër, në kuadër të një turi të paralajmërua falenderimi – për fitoren e thellë të së dielës në Lokale – ku dhe morri tre “kështjella” deri të pamposhtura të PD-së: Shkodrën, Tropojën dhe Kamzën.
Por me një simbolike të fuqishme, ai startoi me Muzeun e anti-komunizmit në Shkodër, ose ndryshe Muzeun e Dëshmisë dhe Kujtesës, duke kumtuar se do shndërrohet në një destinacion të fuqishëm.
“Vizitë në ‘Vendin e Dëshmisë dhe Kujtesës’, ku do të bëjmë një transformim rrënjësor, për ta kthyer nga një hapësirë pa jetë, në një muze mbresëlënës të tragjedisë së persekutimit komunist, destinacion kyç të Shkodrës historike, jo vetëm për vizitorët e për turistët, po edhe për nxënësit shqiptarë kudo jetojnë”, shkruan ai, duke dhënë kështu mesazhin se Shkodra nuk ka rënë në duar komunistësh, siç është aluduar këto ditë në disa shkrime dëshpëruese për kalimin e qytetit verior, i njohur si bastion anti-komunizmi, te PS-ja.
Aty, Rama propozoi dhe një kënd për persekutimin e klerit, pra luftës së komunizmit shqiptar me fenë. “Ne nuk
kemi asnjë muze tamam për persekutimin e fesë, për shembull dhe Shkodra është djepi në kuptimin e zjarrit që u ndez për të persekutuar fenë, plus edhe elementët e tjerë që kanë të bëjnë me qytetin. Jo thjesht klerikët, por edhe familjet, histori lokale dhe mund të jetë shumë interesante. Edhe me pjesën e dëshmitarëve, mund të bëhet arkivimi. Mund të jetë një gjë që është në proces, dëshmi. Mund të bëhet me këta që janë akoma gjallë, të merrni intervista, të digjitalizohen,mund të bëhen me kamera, nëpër qeli, me film. Pjesa e qelive është shumë spektakolare, por ka nevojë të ndërhyhet. Do një investim patjetër, duhet të bëjmë një projekt të mirë. Fati i madh këtu është që hapësira është. Këtu duhet të rikonceptohet komplet”, u shpreh Rama.
Kështu, mesazhin e parë nga Shkodra, i pari i qeverisë që tashmë ka “në dorë” qytetin e gjyshes së tij që e rriti, e dha me anti-komunizmin e tij personal, atë që do e afirmonte fuqishëm në vitet ’90-të. /tesheshi.com/
