Kryeministri Edi Rama nuk e ka mbajur entuziazmin ku media prestigjoze pranë Komisionit Europian, Euobserver publikoi tezën e tij se ishin shqiptarët që e zbuluan vetë kokainën gjysmë toni që kaloi dhe Maltën e Italinë.
Rama e ka publikuar shkrimin të përkthyer në faqen e tij në Facebook, së bashku me një urim për shqiptarët për një fundjavë të qetë.
“Shqipëria përgëzohet për luftën ndaj krimit të organizuar, një kusht thelbësor për hapjen e negociatave të anëtarësimit. Bashkimi Europian ka përgëzuar Shqipërinë për përpjekjet e saj në luftën kundër krimit të organizuar, një parakusht për anëtarësimin e mundshëm në bllokun prej 28 vendesh. Autoritetet thonë se kapja, më parë gjatë kësaj jave, e një sasie rekord kokaine për Shqipërinë, me një vlerë tregu prej rreth 180 milionë eurosh, është një shembull i progresit të bërë në adresimin e këtij problem”, shkruan Martin Banks në portalin e rëndësishëm të Brukselit.
Ai thekson më tej se nuk ka pasur sinjalizime nga policitë e BE-së.
“Ky operacion i suksesshëm u ndërmor pavarësisht mungesës së sinjalizimeve nga ana e vendeve europiane, nga ku kaloi sasia e drogës përpara se të mbërrinte në portin e Durrësit. Autoritetet shqiptare thonë se ndërveprimi i menjëhershëm dhe efikas midis Policisë së Shtetit dhe Prokurorisë së Krimeve të Rënda bëri të mundur përfundimin me sukses të këtij operacioni. Në të shkuarën, lulëzimi i krimit të organizuar, në këtë vend të vogël juglindor me një vijë të gjatë bregdetare në Adriatik është parë si një pengesë për kredencialet europiane të Shqipërisë”, thekson Euobserver. /tesheshi.com/
