Gjatë një fjalimi në parlament, kryeministri Rama është shprehur sërish për një president të të gjithëve. Ai i ka kujtuar opozitës se, edhe pse mazhoranca e ka të lehtë për shkak të numrave zgjedhjen e kreut të ri të shtetit, dëshira është për një president që ka dakortësinë edhe të saj.
“Mund ta kishim zgjedhur dje Presidentin, por nuk po e bëjmë një gjë të tillë. Kjo është forca e shembullit dhe jo shembulli i forcës. Fuqinë numerike që e kemi marrë me mandat popullor, nuk duam ta përdorim për t’i marrë të gjitha për vete. Nuk e kemi këtë tendencë. Fatkeqësisht, në Parlament nuk kemi ndeshur sfidën e ballafaqimit të programeve dhe opinioneve. Por, ne duam sërish t’i japim mundësi atyre që mungojnë në Parlament. Duam një President të paanshëm. Një President që të jetë në gjendje që, kur ka nevojë vendi, të ulë në një tryezë partitë politike”.
Nga ana tjetër, kreu i mazhorancës tha se askush nuk do mund të arrijë ta destabilizojë vendin, duke goditur 18 qershorin si datë kushtetuese zgjedhjesh.
“Të gjitha përpjekjet për të goditur qeverinë dhe 18 qershorin, janë në thelb përpjekje për të goditur stabilitetin e vendit. Asgjë nuk do të ndodhë, përveç asaj që përcakton Kushtetuta si detyrim për përfaqësuesit e popullit, që të paraqiten para popullit me ofertat që do të gjykohen nga populli”, tha Rama.
Gjithashtu, kryemininistri përmendi si avantazh dhe faktin se kreu i Diplomacisë, Ditmir Bushati ka marrë nga Departamenti i Shtetit gjatë një vizite aty një ditë më parë një mbështetje të plotë amerikane për Reformën në Drejtësi. /tesheshi.com/
