Kryeministri Rama u tregua kontradiktor së fundi në Pragë, ku nganjëra anë mbrojti sensin e tij miqësor me “të gjithë” në politikën e jashtme, e nga ana tjetër potencoi mosmiqësinë me Rusinë.
Fillimisht ai shpjegoi raportet e mira me dy kahjet në politikën amerikane, a më saktë si me Bidenin e si me Trumpin.
“Unë jam rritur në kohën e komunizmit, në një regjim të pamëshirshëm komunist, ishim ‘Korea e Veriut’’ e Europës. Komunistët thoshin, ‘miqtë e miqve tanë janë miqtë tanë’, ndërkohë që ‘armiqtë e miqve tanë, janë armiqtë tanë’.
Shqipëria është një vend i vogël, kemi nevojë për miq. Meqë ra fjala, për ta bërë më të qartë, unë jam mik edhe me Jaredin dhe me Alex Sorosin.
Shqipëria është mike me Turqinë dhe me Greqinë, si mund të marrim anë? Si mund të zgjedhim, si duhet të vazhdojmë të forcojmë miqësitë me të dyja këto vende.
Unë jam mik shumë i mirë me Giorgia Melonin, ajo përfaqëson të djathtën dhe më është dashur t’u shpjegoj të miqve të së majtës se nuk është një ide e mirë të mendohet që nëqoftëse shkoj e flas në takimin e partisë së saj ku më kanë ftuar, pra nëse shkoj atje të konsiderohem tradhtar. Ky lloj kategorizimi nuk është i dobishëm në botën e sotme. Njerëzit janë njerëz.
Në fund unë besoj që të flasësh me njerëzit madje edhe të mos biesh dakord në mënyrë të hirshme me ta është shumë më mirë sesa të mos flasësh e të ndezësh mosmarrëveshje, të cilat mund të bëhen shumë dëmtuese për të gjithë”.
Por të njëjtin standart ai nuk e ka ndjekur me Rusinë, ku gjatë qeverisjes së tij, edhe pse Moska ka kërkuar një lloj bashkkëpunimi me Tiranën, Rama i ka çuar raportet në zero.
E megjithatë, për Rusinë tha këto fjalë: “Rusia është një vend i madh, është një kulturë fantastike. Nuk e kam kuptuar asnjëherë, meqë ra fjala, që si është e mundur që për shkak të agresionit në Ukrainë Dostojevksi ndalohet në disa prej universiteteve apo Stravinsky të ishte non-grata në disa trupa baleti. Kjo është pjesë e asaj pozite të keqe në të cilën jemi në një pjesë të botës tonë. Por sa i përket Rusisë, nuk jemi të interesuar, nuk ka oreks aty. Kështu që, Rusia nuk mund të gjejë shumë as spiunë apo njerëz, të cilët janë të gatshëm t’i shërbejnë Rusisë për pak para. Kështu që, Rusia, përzierja e saj në politikën tonë, kemi pasur disa gjëra, por asgjë të madhe”.
Ndërsa për Rusinë e vogël të Ballkanit, Serbinë, pati këtë gjykim: “Aty ku Rusia është e pranishme dhe është shumë influente, dhe që mund të jetë vërtetë një problem, është në pjesë të tjera të Ballkanit dhe kjo është arsyeja pse kemi nevojë që Serbia dhe Kosova të dalin nga konflikti, ndaj na duhet që ta mbajmë Serbinë në anën tonë sa më shumë të jetë e mundur dhe kjo është arsyeja, siç e përmendët ju në një nga pyetjet tuaja, që është e rëndësishme që sa më shumë ta lidhim integrimin europian me integrimin në NATO dhe sa më shumë NATO të jetë e pranishme në sa më shumë vende në Ballkanin Perëndimor, do të ishte shumë më mirë”. /tesheshi.com/
