Kryeministri Edi Rama u bëri thirrje qytetarëve që në datën 21 Qershor të investojnë votën në drejtimin e duhur: jo për të mbajtur me gajret Partinë Demokratike, siç tha Rama, por për të ndryshuar qytetet.
“Nëse nuk do të kishte rëndësi vota, sot Rruga e Arbrit do të ishte fantazmë fushate elektorale; sot nuk do të kishte filluar puna për urën që lidh Dibrën, Peshkopinë dhe Lurën; sot, 9 shkolla që janë rindërtuar nga e para, do të ishin ashtu siç ishin para 23 qershorit”, tha kreu i Partisë Socialiste në një takim në Peshkopi.
“Ka shumë arsye pse vota ka rëndësi sepse përmes saj votohet për familjen, cilësinë e jetës së saj. Votohet për pastërtinë, kopshtet, shkollat, hapësirat që u vihen në dispozicion të moshuarve. Zgjedhjet e 21 qershorit nuk janë për të ndarë votën majtas e djathtas, por për ta bashkuar në drejtimin e duhur për t’i dhënë mundësi familjes të jetojë në një bashki ku punohet ditë e natë për të krijuar kushtet e duhura”, shtoi Rama.
