Kryeministri Edi Rama e ka nisur vizitën e tij në SHBA me një pritje që i është bërë nga kryebashkiaku i Nju Jorkut, Bill de Blasio dhe me një takim që ka mbajtur me diasporën shqiptare në SHBA.
Ky takim është zhvilluar në muzeun e trashëgimisë hebreje, ku është shfaqur edhe filmi “Besa” që flet për mikpritjen që shqiptarët myslimanë i bënë hebrenjve gjatë Luftës së Dytë Botërore dhe i fshehën në shtëpitë e tyre për të mos i dorëzuar tek nazistët.
Takimi është zhvilluar normalisht pasi ka qenë gjithçka e planifikuar me detaje.
Vetë Edi Rama, shprehet entuziast në një postim që shkroi në rrjetet sociale.
“Faleminderit çdokujt që me praninë sonte e bëri takimin me shqiptarët e Nju Jorkut kaq mbresëlënës për numrin e madh dhe energjjnë pozitive”, thekson Rama.
Ndërkaq Kryeministri shqiptar është takuar me kryebashkiakun e Nju Jorkut, takim që është shpërndarë nga Komisioneria e Lartë e bashkisë së metropolit amerikan për çështjet ndërkombëtare, Penny Abeyvvardena. Në një postim në Twitter bashkë me foton Rama-De Blasio, Abeyvvardena thekson: “Eveniment i rëndësishëm të mirëpresësh Edi Ramën në zyrën e kryebashkiakut. Komuniteti shqiptar është shumë i rëndësishëm për të intensifikuar diversitetin e Nju Jorkut”.
Por ndërkaq, një shoqatë e rëndësishme e shqiptarëve në SHBA, “Vatra” që dikur është kryesuar nga Noli, ka mbajtur një deklaratë ku e sulmon Edi Ramën mbi deklaratën e tij për Donald Trump-in.
Shoqata “Vatra” është e njohur për afërsinë e saj me Partinë Demokratike dhe gjatë qeverisjes së PD-së ka bërë disa deklarata kundër Ramës atëherë kreu i opozitës.
Në deklaratën e saj “Vatra” thekson se “Dënojmë unanimisht deklaratën e Kryeministrit Edi Rama mbi zotin Donald Trumb pasi e konsiderojmë si një qëndrim i papërgjegjshëm”.
Ndërkaq, jashtë ndërtesës një grup qytetarësh me origjinë nga Tropoja kanë protestuar kundër ndërtimit të disa hidrocentraleve në lumin Valbona. Këto koncensione janë dhënë nga qeveria e shkuar në vitin 2012 dhe ministria e Energjitikës ka bërë të ditur se nuk do të lejojë ndërtimin e tyre.
Megjithatë, shqiptarët e SHBA treguan se janë pjesë e pandarë e vendit të tyre dhe kanë të njëjtën performancë dhe përçarje sipas partive politike, edhe pse jetojnë e punojnë në një vend demokratik dhe institucione të forta siç janë Shtetet e Bashkuara të Amerikës. /tesheshi.com/
