Implementimi i Vettingut ka nisur dhe rezultatet do të vijnë shumë shpejt. Kështu u shpreh kryeministri Edi Rama gjatë fjalës së mbajtur në Kuvend, në një seancë pyetjesh mbi programin e qeverisë. Kryeministrit iu drejtuan pyetje vetëm nga deputetët e LSI-së, ndërsa PD e cilësoi seancën si propogandë, pasi nuk lejohej debati.
Një nga pyetjet që iu drejtua Ramës kishte të bënte me integrimin.
“Çelja e negociatave nuk lidhet me atë çfarë mund të bëjmë ne më mirë. Në fillim u vendosën 5 pyetje. Pastaj u vu Vettingu.
Implementimi i Vettingut ka nisur dhe rezultatet do të vijnë shumë shpejt. Por nëse BE kërkon më shumë kohë për probleme të veta, atëherë mund të vazhdojë të thotë që thellohuni, thellohuni me vettingun dhe ne e dimë mirë se çfarë do të thotë kjo.
Nëse nuk e dini, pyetni Luan Ramën t’ua thotë. Pastaj, dolën zgjedhjet e lira. Pastaj hyri dhe doli dhe hyri, çështja e kanabisit.
Në fund të këtij sezoni mbjelljesh dhe kultivimi, do të shihni rezultate spektakolare. Ka dalë edhe fantazma e krimit etnik shqiptar e nxitur nga forca të caktuara.
Sidoqoftë, përgjigja ime është gjithashtu e thjeshtë dhe optimiste sepse reformat e thella, lufta kundër korrupsionit dhe krimit, implementimi i mëtejshëm i reformës në drejtësi, në tërësi reformimi i shtetit, janë vetë procesi i integrimit evropian. Shqipëria është ajo që ua detyrojmë të parëve dhe fëmijëve tanë”, tha Rama. /tesheshi.com/
