Kryeministri Edi Rama e çeli me ekonominë konferencën e fundvitit për mediat, duke theksuar se ajo është në rrugën e duhur falë një procesi të gjerë reformash. Në një analizë të rrugëtimit të reformave përgjatë një viti, kreu i Qeverisë theksoi se 2016-a përmban aspektin më kuptimplotë të një procesi reformash që kanë filluar të çelin rrugën e re në drejtimin e duhur.
“Kemi një ekonomi që rritet në mënyrë të qëndrueshme. Sipas gjithë parashikimeve do të mbyllet këtë vit me një rritje midis 3.3 dhe 3.5 për qind. Jemi larg kufirit të ambicies tonë me një rritje prej 5%. Asnjëherë më parë rritja e rrogave dhe pensioneve nuk është shoqëruar me ulje borxhi, por përkundrazi është bërë me rritje të borxhit”, vuri në dukje kryeministri.
Më tej, ai foli edhe për dëmshpërblimet e banorëve të përmbytur si dhe zerimin e kamatëvonesave të energjisë për familjet në nevojë dhe pensionistët.
“Qeveria jonë nuk harron askënd dhe nëse mundësitë nuk janë për t’u përgjigjur në çast, pa dyshim kur vjen momenti, ne japim përgjigje”, tha shefi i qeverisë. /tesheshi.com/
