Nga Kavaja, qyteti që vitet e fundit ndryshoi kurs politik dhe nga bastion i së djathtës u kthye në qytet që voton të majtën, kryeministri Edi Rama, përçoi dhe njëherë atë mesazh të cilit po i mëshon fort kohët e fundit, që vetëm PS-ja mund të bëjë.
“Po ecim çdo ditë përpara në drejtimin e duhur dhe njerëzit nuk janë budallenj që të hanë ato që i shërbehet nga politika e vjetër. Njerëzit shohin e kuptojnë se kush është drejtimi dhe zgjedhja e duhur. Në Kavajë kanë bërë 3 herë rresht zgjedhjen e duhur dhe kanë mundur të shohin transformime, por ajo që do të bëjmë do të jetë edhe më shumë se ç’është bërë. Ka shumë probleme për të zgjidhur e për këtë arsye duhet të vazhdojmë rrugën e reformave për të bërë shtet dhe shtet në këtë vend mund të bëjë vetëm PS-ja. Pikërisht pse kemi ndërmarrë rrugën e reformave që të tjerët nuk guxuan ta mendonin, e jo më ta bënin, sot kemi rezistencë vulgare prej kundërshtarëve të reformave”, tha Rama.
Por në fjalën e tij, ai kë lënë vend dhe për t’u vënë fuqishëm në mbrojtje të ministrit Ilir Beqaj. E pra, kreu i Shëndetësië, i cili është më i akuzuari në kabinetin e tij, i ka bërë një nder të madh Shqipërisë me punën e tij.
“Beqaj është nga më të sulmuarit pasi ka prekur interesa. Beqaj i ka kursyer popullit 70 milionë dollarë për ilaçe që shkonin diku tjetër. Të mos lejosh të dalin nga xhepat e popullit këto para, do të thotë që të lëndosh ata që ishin mësuar t’i merrnin. Janë këta persona që bëjnë rezistencë dhe akuzojnë”, theksoi shefi i qeverisë shqiptare. /tesheshi.com/
